Ashadhi Ekadashi Mahapuja : मुख्यमंत्र्यांच्या हस्ते सपत्नीक विठ्ठल-रुक्मिणीची महापूजा संपन्न; यंदा नाशिकच्या शेतकरी दाम्पत्याला मिळाला पूजेचा मान

Ashadhi Ekadashi Pandharpur Mahapuja : आषाढी एकादशीनिमित्त मुख्यमंत्री एकनाथ शिंदे यांनी सपत्नीक विठ्ठल-रुक्मिणी मंदिरात महापूजा केली. यावेळी एकनाथ शिंदे (Eknath Shinde) यांच्या पत्नी लता शिंदे, मुलगा खासदार श्रीकांत शिंदे, सून वृषाली शिंदे आणि नातू रुद्रांश शिंदे असं संपूर्ण कुटुंब उपस्थित आहे.

विठ्ठलाची महापूजा (Vitthal Mahapuja) संपन्न झाल्यानंतर मुख्यमंत्री आपल्या कुटुंब आणि मानाचे वारकरी अहिरे दाम्पत्यासह रुक्मिणी मातेच्या दर्शनाला गेले. इथं रुक्मिणी मातेला दुग्धाभिषेक घालून पूजा करण्यात आली. दरम्यान, प्रसाद म्हणून श्रीफळ, तुळशी हार आणि पुष्पहार मुख्यमंत्र्यांना देण्यात आला.

विठ्ठलाच्या पूजेसाठी मानाचे वारकरी यंदा नाशिक जिल्ह्यातील दाम्पत्य ठरले आहेत. सटाणा तालुक्यातील अंबासन गावातील बाळू शंकर अहिरे (वय 55) आणि सौ. आशाबाई बाळू अहिरे (वय 50 यांना संधी मिळाली आहे. अहिरे दाम्पत्य गेल्या 16 वर्षांपासून पंढरीची वारी करत आहेत.