Solapur Custodial Death: पोलीस कोठडीत संशयित आरोपी मृत्यू प्रकरण, ७ पोलिसांचा अटकपूर्व जामीन मंजूर

Solapur Crime News: विजापूर नाका पोलिस ठाण्यातील कोठडीत संशयित आरोपीच्या मृत्यूप्रकरणी पोलिस निरीक्षकासह सात पोलिसांना मुंबई उच्च न्यायालयाने ५० हजारांच्या जातमुचलक्यावर अटकपूर्व जामीन मंजूर केला.

पोलिस निरीक्षक उदयसिंह पाटील, सहायक पोलिस निरीक्षक शीतलकुमार कोल्हाळ, पोलिस हवालदार श्रीरंग खांडेकर, पोलिस नाईक शिवानंद पिंपळे, पोलिस नाईक लक्ष्मण राठोड, पोलिस नाईक अंबादास गड्डम, पोलिस शिपाई आतिश पाटील अशी अटकपूर्व जामीन मिळालेल्या संशयितांची नावे आहेत. ३ ऑक्टोबर २०२१ रोजी विजापूर नाका पोलिस ठाण्याच्या कोठडीत संशयित भीमा राजा काळे (वय ४१) याचा मृत्यू झाला होता.

संशयितांच्या मारहाणीमुळे त्याचा मृत्यू झाल्याचा संशयितांविरुद्ध गुन्हा दाखल केला होता. याप्रकरणी संशयितांनी मुंबई उच्च न्यायालयात अटकपूर्व जामिनासाठी अर्ज केला होता. या प्रकरणात फौजदारी प्रक्रिया संहिता १७६ नुसार न्यायालयीन चौकशी झाली आहे. या चौकशीत संशयित पोलिस अधिकारी व कर्मचाऱ्यांनी संशयित भीमा काळे यास कोणत्याही प्रकारची मारहाण केली नाही. त्याचा मृत्यू नैसर्गिकरित्या झाल्याचे म्हटल्याचे न्यायाधीश भारती डांगरे यांनी नमूद केले आहे.

ॲट्रॉसिटी लागू होत नाही, न्यायालयाचे निरीक्षण

उच्च न्यायालयाने हा गुन्हा भारतीय दंड संहिता कलम ३०४ नुसार गुन्हा होत नसल्याचे निरीक्षण नोंदवले आहे. तसेच याप्रकरणी अनुसूचित जाती जमाती अत्याचार प्रतिबंध अधिनियम (ॲट्रॉसिटी) लागू होत नसल्याचे निरीक्षण नोंदवलेले आहे. (Latest Marathi News)