बापरे..! काय हे रक्तरंजित धूलिवंदन!

नरखेड (सोलापूर) ः भोयरे (ता. मोहोळ) येथील जगदंबा मातेच्या यात्रेनिमित्त धूलिवंदनाच्या दिवशी मंदिराच्या पायथ्यापासून मंदिरावर व मंदिरावरून पायथ्याकडे मोठ्या प्रमाणात दगडफेक केली जाते. यात काही यात्रेकरू जखमी होऊन अनेकांचे रक्त सांडले जाते. असे रक्तरंजित धूलिवंदन महाराष्ट्रात फक्त भोयरे येथेच पाहायला मिळते. त्यामुळेही धूलिवंदन पाहण्यासाठी येथे मोठ्या संख्येने गर्दी होते.

हेही वाचा - महावितरणने दिला शेतकऱ्यांना दिलासा

दगडफेकीत अनेक भाविक जखमी
तुळजापूर येथील भवानी मातेची लाडकी बहीण म्हणून ओळखली जाणारी येथील जगदंबा माता. या जगदंबा मातेची यात्रा होळीचा सण झाल्यानंतर दुसऱ्याच दिवशी म्हणजे धूलिवंदनाच्या दिवशी मोठ्या उत्साहात साजरा होतो. या देवीची पूजाअर्चा व छबिना मिरवणूक काढली जाते. धूलिवंदनाच्या दिवशी देवीची पूजा करून भोगावती नदीपात्रात कुस्त्यांचा फड रंगतो. हा कुस्त्यांचा फड झाल्यानंतर वाजतगाजत मंदिराकडे सर्व ग्रामस्थ व यात्रेकरू येतात. काही भाविक-भक्त मंदिरात पोचतात तर काही भक्तमंडळी मंदिराच्या पायथ्याशी थांबतात. पुजाऱ्यांचा आदेश येताच मंदिरावरील लोक मंदिराच्या पायथ्याजवळील यात्रेकरू एकमेकांवर मोठ्या प्रमाणात दगडांचा वर्षाव करतात. यामध्ये अनेकजण जखमी होतात. प्रसंगी रक्त सांडले जाते. परंतु या जखमींपैकी कोणीही औषधोपचार घेत नाहीत. या दगडफेकीनंतर थांबण्याचा पुजाऱ्याचा आदेश येतो तेव्हाच दगडफेक थांबून देवीच्या दर्शनानंतर यात्रेची सांगता होते.