नजीक पिंपरीत एकाच वेळी चार घरफोडया; पाच लाखाचा ऐवज लंपास

मोहोळ(सोलापुर) : नजीक पिंपरी ता मोहोळ येथे अज्ञात चोरट्यांनी एकाच रात्री चार ठिकाणी घरफोड्या केल्या. ही घटना सोमवार ता 18 ऑक्टोबर रोजी सकाळी उघडकीस आली. चोरट्यांनी रोख रक्कम, सोन्या-चांदीचे दागिने व दुचाकीसह सुमारे पाच लाख रुपयांपेक्षा जास्त किंमतीचा ऐवज लंपास केला आहे. या प्रकरणी मोहोळ पोलिसात अज्ञात चोरटया विरोधात गुन्हा दाखल करण्यात आला आहे.

या बाबत पोलिसांकडून मिळालेली माहिती अशी की, नजीक पिंपरी येथील निवृत्ती दत्तात्रय वाघमोडे हे मसाल्याचे व्यापारी आहेत. 17 ऑक्टोंबर रोजी ते पत्नी, मुला बाळांसह आई वडील राहत असलेल्या घरी मुक्कामी गेले होते. या संधीचा फायदा घेत अज्ञात चोरट्यांनी मध्यरात्री त्यांच्या घराचे कुलूप तोडून घरातील सोन्या-चांदीचे दागिने रोख रक्कम असा एकूण एक लाख 85 हजार रुपयांचा ऐवज चोरून नेला.

सिद्राम गोविंद वाघमोडे यांचीही घरफोडी झाली असून चोरट्यांनी एक मोबाईल ,3 तोळे सोने चोरुन नेले आहे. त्याच प्रमाणे दिलीप हुकुम वाघमोडे यांच्या घराचे कुलूप तोडुन दोन लाख रुपये रोख रक्कम, पाच तोळे सोन्याचे दागिने व 60 ग्रॅमचे चांदीचे दागिने लंपास केले. तर फुलचंद शिवाजी मेटकरी यांची होंडा शाईन कंपनीची मोटारसायकल चोरुन नेली आहे. सोमवारी सकाळी घरफोडीच्या घटना उघडकीस आल्याने नजीक पिंपरी गावात एकच खळबळ उडाली. दरम्यान घटनेची माहिती मिळताच मोहोळ पोलिसांनी घटना स्थळाची पाहणी करून चोरट्यांच्या शोधासाठी पथके रवाना केली आहेत.

या प्रकरणी निवृत्ती दत्तात्रय वाघमोडे यांनी मोहोळ पोलिसात फिर्याद दिली असुन अज्ञात चोरट्यांच्या विरोधात घरफोडीचा गुन्हा दाखल करण्यात आला आहे. मोहोळ पोलीस ठाण्याच्या हद्दीत एकाच रात्री चार घरफोड्या झाल्याने नागरिकांमध्ये भीतीचे वातावरण पसरले आहे.या गुन्ह्याचा तपास पोलीस निरीक्षक अशोक सायकर करीत आहेत.