पदभार घेण्यापूर्वीच कराळेंची बदली! सोलापूरच्या पोलिस आयुक्‍तपदी बैजल

सोलापूर: शहराचे पोलिस आयुक्‍त अंकुश शिंदे यांना मुंबईतील सुधार सेवा याठिकाणी विशेष पोलिस महानिरीक्षक म्हणून पदोन्नती मिळाली. दुसरीकडे ठाण्याचे अप्पर पोलिस आयुक्‍त दत्तात्रय कराळे यांना सोलापूरचे पोलिस आयुक्‍त म्हणून पदोन्नती मिळाली. मात्र, पदभार घेण्यापूर्वीच त्यांची गृह विभागाने त्यांची बदली रद्द केली. त्यामुळे आता सायबरचे पोलिस उपमहानिरीक्षक हरीश बैजल यांची त्याठिकाणी बदली झाली. पुढील आठवड्यात ते पदभार घेतील, अशी आशा आहे.

गणेशोत्सवामुळे अधिकाऱ्यांच्या बदल्या होऊनही त्यांना कार्यमुक्‍त केले नसल्याचे सांगणाऱ्या गृह विभागाने शुक्रवारी (ता. 8) दोन वरिष्ठ पोलिस अधिकाऱ्यांच्या बदलीचे आदेश काढले. अप्पर पोलिस आयुक्‍त रामनाथ पोफळे व हरीश बैजल यांचा त्यात समावेश आहे. काही दिवसांपूर्वी गृह राज्यमंत्री सतेज पाटील यांनी सोलापूर दौरा केला. त्यावेळी काही दिवसांत सोलापूरचे नवे पोलिस आयुक्‍त रूजू होतील, अशी ग्वाही दिली होती. परंतु, त्याचवेळी त्यांनी कराळे की अन्य कोणी, याबद्दल स्पष्टीकरण दिले नव्हते. बैजल यांनी यापू्र्वी दक्षता विभागाचे सहआयुक्‍त म्हणूनही काम केले आहे. 2016 मध्ये चिंचोली एमआयडीसीतील एव्हॉन कंपनीत सापडलेल्या इफेड्रिन प्रकरणी 'एफडीए'तील सात अधिकाऱ्यांवरील कारवाईचा प्रस्ताव दिला होता. त्यांनी गोंदियाचे पोलिस अधीक्षक म्हणूनही काम केले आहे.

बदली झाली, पण कार्यमुक्‍त नाहीच

सोलापूर शहराचे नवे पोलिस आयुक्‍त म्हणून दत्तात्रय कराळे यांना पदोन्नती मिळाल्याचे आदेश गृह विभागाने 23 ऑगस्ट रोजी काढले. मात्र, कराळे यांची बदली रद्द झाल्यानंतर सायबरचे पोलिस उपमहानिरीक्षक हरीश बैजल यांच्याकडे सोलापूर शहराचे पोलिस आयुक्‍तपद सोपविण्यात आले. मात्र, अजूनपर्यंत त्यांना पहिल्या पदावरून कार्यमुक्‍त केले नसल्याचे सूत्रांकडून सांगण्यात आले. त्यामुळे ते पोलिस आयुक्‍तपदाचा पदभार कधी स्वीकारतील, हे निश्‍चित नसल्याचेही सूत्रांनी स्पष्ट केले.