Madha Lok Sabha: माढ्यात भाजपला मोठा धक्का, धैर्यशील मोहिते पाटलांचं ठरलं? भाजप सदस्यत्वाचा दिला राजीनामा

माढा लोकसभा निवडणुकीची तयारी दौरे, सभा, प्रचार सुरु असताना पश्चिम महाराष्ट्रात भाजपला मोठा धक्का बसला आहे. भाजप नेते धैर्यशील मोहिते पाटील यांनी आपला भाजप सदस्यत्वाचा राजीनामा दिला आहे. लवकरच ते राष्ट्रवादी काँग्रेस शरदचंद्र पवार पक्षात प्रवेश करणार, असल्याची माहिती समोर आली आहे. माढ्याची उमेदवारी जाहीर झाल्यानंतर गेल्या धैर्यशील मोहिते पाटील हे नाराज असल्याच्या चर्चा रंगल्या होत्या.

माढा लोकसभा मतदारसंघातून भाजपने रणजितसिंह नाईक निंबाळकर यांना उमेदवारी केली त्यानंतर धैर्यशील मोहिते पाटील हे नाराज झाल्याच्या चर्चा सुरू झाल्या होत्या. लोकसभा निवडणूक लढवण्यासाठी मोहिते पाटील राष्ट्रवादी काँग्रेस शरदचंद्र पवार यांच्या पक्षात प्रवेश करणार, अशा चर्चा आहेत.

काल (गुरुवारी ता. ११) धैर्यशील मोहिते पाटील यांनी पुण्यात शरद पवार यांची भेट घेतली घेतली. यानंतर ते राष्ट्रवादीत प्रवेश करणार असल्याचे निश्चित झाले. शरद पवार यांच्या भेटीनंतर धैर्यशील मोहिते पाटील यांनी गुरुवारी मध्यरात्रीच भाजप सदस्यत्वाचा राजीनामा दिला आहे.

ऐन निवडणुकीच्या तंडावर भाजपला मोठा धक्का बसला आहे. माढा लोकसभा मतदारसंघातून धैर्यशील मोहिते पाटील हे राष्ट्रवादीचे उमेदवार असण्याची शक्यता आहे. त्यामुळे भाजपाची मोठी डोकेदुखी होणार आहे.

धैर्यशील मोहिते पाटील यांनी गेल्या वर्षभरापासून माढा लोकसभा निवडणूक लढविण्याचे निश्‍चित केले होते. तसा त्यांनी प्रसार माध्यमातून प्रचार आणि प्रसारही केला होता. भाजपकडे अतिशय ताकदीने आपणास उमेदवारी मिळावी म्हणून त्यांनी प्रयत्नही केले. परंतु भाजपने विद्यमान खासदार रणजितसिंग नाईक-निंबाळकर यांना पहिल्याच यादीत उमेदवारी जाहीर करून मोहिते पाटील यांच्या मागणीकडे दुर्लक्ष केले.

त्यामुळे मोहिते-पाटील आणि त्यांच्या समर्थकांमध्ये प्रचंड नाराजी सुरू झाली. यातून धैर्यशील मोहिते पाटील यांनी बंडाचे निशान फडकवले. त्यानंतर धैर्यशील आणि मोहिते-पाटील परिवारातील सर्व सदस्यांनी माढा लोकसभा मतदारसंघ अक्षरशः पिंजून काढला.