Solapur News : महावितरणच्या रडारवर थकबाकीदार; दोन लाख ग्राहकांचा वीजपुरवठा होणार खंडित

सोलापूर : थकीत वीजबिलांचा भरणा न केल्यामुळे महावितरणकडून वीजपुरवठा खंडित केला जात आहे. थकबाकीची रक्कम व नियमानुसार पूनर्जोडणी शुल्क अधिक जीएसटी घेतल्याशिवाय पुन्हा वीजपुरवठा सुरू केला जाणार नसल्याचे स्पष्ट करण्यात आले आहे.

पश्चिम महाराष्ट्रातील तब्बल ४५ हजार थकबाकीदारांचा वीजपुरवठा खंडित केला आहे. त्यात आता सोलापूर जिल्ह्यातील दोन लाख ग्राहक महावितरणच्या रडावर आहेत.पश्चिम महाराष्ट्रातील घरगुती, वाणिज्यिक व औद्योगिक १४ लाख १६ हजार ३०० ग्राहकांकडे २५४ कोटी २० लाख रुपयांची थकबाकी आहे.

यामध्ये सोलापूर जिल्ह्यातील एक लाख ९६ हजार ९१५ ग्राहकांकडे ३१ कोटी ९४ लाख रुपयांची थकबाकी आहे. थकबाकीमुळे गेल्या महिन्याभरात सोलापूर जिल्ह्यातील सहा हजार १५४ ग्राहकांचा वीजपुरवठा खंडित करण्यात आला आहे.

आर्थिक अडचणीतील ‘महावितरण’ने थकीत रक्कम किती आहे हे न पाहता आता नियमानुसार वीजपुरवठा खंडित करण्याची धडक कारवाई सुरु केली आहे. त्यामुळे थकबाकीदारांनी www.mahadiscom.in या वेबसाइटवर तसेच महावितरणच्या मोबाईल अॅपद्वारे वीजबिल भरावे.

थकबाकी न भरल्यास ऐन उन्हाळ्यात ग्राहकांना उकाड्याचा त्रास सोसावा लागणार आहे. पाच हजार रुपयांपेक्षा अधिक बिल असणाऱ्या सर्व लघुदाब ग्राहकांना आरटीजीएस किंवा एनईएफटीद्वारे वीजबिल भरण्याची सुविधा देखील उपलब्ध असल्याचे ‘महावितरण’ने स्पष्ट केले आहे.

रूफ टॉप सोलरमुळे वीजबिलापासून मुक्ती

केंद्र सरकारकडून ग्राहकाला एक किलोवॉटसाठी ३० हजार रुपये, दोन किलोवॉटसाठी ६० हजार व तीन किलोवॉटसाठी ७८ हजार रुपयांचे अनुदान आहे. ग्राहकांनी https://pmsuryaghar.gov.in या पोर्टलवर ऑनलाइन नोंदणी करावी.

‘पीएम सूर्यघर’ ॲप मोबाईलमध्ये उपलब्ध आहे. एक किलोवॅटच्या रूफ टॉप सोलरमधून दररोज चार युनिट अर्थात दरमहा सुमारे १२० युनिट वीज तयार होते. महिना १५० युनिटपर्यंत वीज वापर करणाऱ्या कुटुंबाला दोन किलोवॉटपर्यंतच्या क्षमतेची सोलर सिस्टिम पुरेशी आहे. घराच्या छतावर रूफ टॉप सोलर वीजनिर्मिती प्रकल्प बसवून सौरऊर्जेचा वापर करून वीजनिर्मिती करायची व ती वीज घरी वापरून विजेची गरज पूर्ण करायची, अशी ही योजना आहे.