पालकमंत्री भरणेंना मंत्रिमंडळातून काढून टाका : आमदार शहाजी पाटील

सांगोला (सोलापूर) : पालकमंत्री दत्तात्रय भरणे (Guardian Minister Dattatraya Bharane) यांनी मुख्यमंत्र्यांच्या विरोधात अपशब्द वापरले, याचा आम्ही तीव्र शब्दात निषेध व्यक्त करतो. आमच्या नेत्यावर अपशब्द वापरल्यास त्याला तोडीस तोड भाषा आमच्याकडे आहे. असे बेताल वक्तव्य करणाऱ्या पालकमंत्र्यांना मंत्रिमंडळ (Cabinet) ठेवू नये, त्यांना मंत्रिमंडळातून काढून टाका, अशी मागणी सांगोल्याचे शिवसेनेचे आमदार शहाजी पाटील (MLA Shahaji Patil) यांनी केली.

सोलापूर येथील एका कार्यक्रमामध्ये सोलापूरचे पालकमंत्री दत्तात्रय भरणे यांनी मुख्यमंत्र्यांबद्दल बेताल वक्तव्य केले होते. याची दखल घेत सांगोल्याचे शिवसेनेचे आमदार शहाजी पाटील म्हणाले की, मुख्यमंत्र्यांबद्दल असे वक्तव्य करणे अतिशय दुर्दैवी गोष्ट असून, अशा पद्धतीने आमच्या नेत्यावर, आमच्या पक्ष प्रमुखांवर अपशब्द कोणी वापरले तर त्याला तोडीस तोड भाषा आमच्याकडे आहे. आमची तोफ आम्ही डागायला सुरवात केली, आम्ही आग ओकायला सुरवात केली तर भरणेच काय तर त्यांच्या नेत्यांना पळवून लावण्याएवढी आग आमच्या शिवसैनिकांच्या छातीत भरली आहे.

परंतु सध्याचे आघाडीचे सरकार आहे आणि हे सरकार चालवत असताना कुठल्याही शिवसैनिकांनी मित्रपक्षांवर, नेत्यांवर अपशब्द बोलायचे नाही, असा आदेश आमचे नेते उद्धव ठाकरे यांनी दिला आहे. आमची संस्कृती आम्ही जतन करत आहोत, परंतु पालकमंत्र्यांच्या वाक्‍याचा आम्ही निषेध तर करतोच परंतु मी स्वतः मुंबई येथे जाऊन मुख्यमंत्री उद्धव ठाकरे, उपमुख्यमंत्री अजित पवार, राज्याच्या आघाडी सरकारचे मार्गदर्शक शरद पवार यांच्याकडे जाऊन अशा लोकांना मंत्रिमंडळात ठेवणे हे गैर आहे, अशा नेत्याला मंत्रिमंडळातून काढून टाकावे, अशी मागणी करणार आहे. आणि त्यांनी जर पालकमंत्र्यांना मंत्रिमंडळातून काढून टाकले नाही तर आम्हाला पुढचे पाऊल उचलावे लागेल, असा इशाराही आमदार शहाजी पाटील यांनी दिला आहे.