Raj Thackeray In Solapur: पंतप्रधानांकडून भेदभाव होतोय...; राज ठाकरेंनी नरेंद्र मोदींवर डागली तोफ

Solapur News: विधानसभेच्या पार्श्वभूमीवर महाराष्ट्र नवनिर्माण सेनेचे प्रमुख राज ठाकरे हे सोलापूर दौऱ्यावर आहेत. यावेळी घेतलेल्या पत्रकार परिषदेत त्यांनी विविध विषयांवर भाष्य केलं आहे. यावेळी राज ठाकरे यांनी पंतप्रधान नरेंद्र मोदी यांच्यावर देखील तोफ डागली आहे. क्रीडा क्षेत्रासाठी गुजरात आणि उत्तर प्रदेशसाठी सर्वात जास्त निधी देण्यात आला आहे. हे योग्य नाही, असं राज ठाकरे म्हणाले.

हा महाविकास आघाडी किंवा महायुती असा प्रश्न आहे. जे चूक आहे ते चूक आहे. पंतप्रधान मोदी यांनी स्पोर्टसाठीचे सर्वाधिक बजेट गुजरात आणि यूपीला देण्यात आला आहे. पंतप्रधानांनी सर्व राज्यांना समान न्याय द्यायला हवा. त्यांनी सर्व राज्यांना समान पद्धतीने पाहिलं पाहिजे. उद्या ते गुजरातमध्ये ऑलिम्पिक आणू पाहात आहेत, सर्वात मोठं स्टेडियम बांधायचं आहे ते देखील गुजरातमध्ये, असं कसं करून चालेल, असं म्हणत राज ठाकरेंनी मोदींवर टीका केली.

उद्या महाराष्ट्रातला पंतप्रधान झाला अन् त्याने सर्व महाराष्ट्रासाठी आणलं तरी देखील मी त्याच्यावर टीका करेन. कारण, पंतप्रधानांनी सर्व राज्यांना समान दृष्टीने पाहिलं पाहिजे. ही गोष्ट होताना दिसत नाही. मग यावर का आक्षेप घ्यायचा नाही. चांगल्याला चांगलं आणि वाईटाला वाईट म्हणावं हे मी पाळतो, असं राज ठाकरे म्हणाले.

आमचा पक्ष आता जन्माला आला आहे. त्याला १८ वर्षे झाली आहेत. काँग्रेसची स्थिती बघा, त्यांनी ६५ वर्षे राज्य केलं. त्यांना ४४ वर यावं लागलं. तुम्ही आमचं काय घेऊन बसला आहात. पण, विधानसभेमध्ये वेगळं चित्र असेच. निश्चित तुम्हाला वेगळं चित्र दिसेल असं राज ठाकरे म्हणाले आहेत.

महाराष्ट्रामध्ये आरक्षणाची गरजच नाही. महाराष्ट्रातील लोकांना सर्व सुविधा देण्याची क्षमता राज्यात आहेत. पण, बाहेरून लोक येतात त्यामुळे अडचणी निर्माण होतात. महाराष्ट्रातल्या नोकरीच्या जाहिराती यूपी-बिहारमध्ये येतात. मला काही देश तोडायचं नाही. पण, आधी राज्यातील तरुणांना रोजगार द्या. त्यानंतर काही उरलं तर दुसऱ्या राज्यातील लोकांना संधी द्या, अशी भूमिका राज ठाकरेंनी स्पष्ट केली.