Solapur : मोहोळ तालुक्यात मोटरसायकल चोरीचे प्रमाण वाढले पेअँड पार्कची सोय करण्याची मागणी

मोहोळ : मोहोळ तालुक्यात मोटरसायकल चोरीचे प्रमाण वाढले असून, यामुळे नागरिकात घबराट पसरली आहे. या संदर्भात अधिक माहिती अशी की, मोहोळ तालुक्याच्या ग्रामीण भागातून दररोज अनेक नागरिक आपल्या विविध कामासाठी शहरातील तहसील कार्यालय, पोलीस ठाणे, पंचायत समिती कार्यालय, भूमी अभिलेख कार्यालय यासह अन्य ठिकाणी येतात. नागरिक आपली मोटरसायकल संबंधित कार्यालयाच्या आवारात पार्क करून कामासाठी जातात. हीच संधी साधत मोटरसायकल चोर मोटारसायकलचे हँडल लॉक तोडून वेळप्रसंगी बनावट चावी लावून हातो हात मोटरसायकल लांबवितात.

विशेष म्हणजे मोहोळ शहराच्या हद्दवाढ भागातील तसेच शहरातील घरासमोरील पार्क केलेल्या मोटरसायकली ही चोरीच्या घटना घडल्या आहेत. गेल्या वर्ष भराच्या जानेवारी ते सप्टेंबर या कालावधीत तब्बल 37 मोटरसायकली पोलीस ठाण्याच्या हद्दीतून चोरीस गेल्या आहेत. त्यापैकी केवळ दहा मोटरसायकली तपासात सापडल्याचे पोलिसाकडून सांगण्यात आले. मोहोळ परिसर हा अपघाती परिसर म्हणून ओळखला जातो, अपघात झाल्यानंतर मोहोळ पोलीस ठाण्यातील अपघात पथक अपघात ग्रस्त चार चाकी, दुचाकी वाहने पोलीस ठाण्याच्या पुढील व मागील आवारात आणून लावतात. हुशार चोरटे या अपघातग्रस्त वाहनांचे रात्रीच्या वेळी सुटे भागही काढून नेत असल्याची चर्चा आहे. मोटारसायकल चोरीच्या भीतीमुळे कामासाठी आलेल्या नागरिकांचे निम्मे लक्ष कामात व निम्मे लक्ष मोटरसायकलीवर अशी सध्याची अवस्था आहे.

पे अँड पार्क योजना सुरू करावी---

मोहोळ तहसील व पोलीस ठाण्याच्या पाठीमागील बाजूस राष्ट्रीय महामार्गा लगत मोठे पटांगण आहे. या ठिकाणी शासनाने चार चाकी व दुचाकी साठी सोलापूरच्या धरतीवर योग्य शुल्क आकारून पार्किंगची सोय केल्यास चोरीच्या घटना कमी होतील, पोलिसांचे कामही कमी होईल व नागरिकांना निश्चितपणे आपली कामे करता येतील. पे अँड पार्कची योजना सुरू केली तर शासनाला त्यातून महसूल तर मिळणार आहेच, पण किमान दोन ते तीन जणांना रोजगारही उपलब्ध होणार आहे.

ही योजना मोहोळ तालुक्यातील काही पत्रकार व नागरिक यांनी प्रशासनाला सुचवली होती, मात्र त्यावर अद्याप काहीच निर्णय झाला नाही. अनेकाकडे दुचाकीची कागदपत्रे नसतात. पोलीस ठाण्यात मोटरसायकल चोरीची फिर्याद देण्यास गेल्यास कागदपत्रांची आवश्यकता लागते. त्यामुळे अनेक जण चोरीची तक्रार द्यायलाच येत नाहीत.