'जरांगेंच्या आंदोलनाला पाठिंबा देऊन मराठ्यांचा आवाज दिल्ली दरबारी पोहोचवा'; खासदार प्रणिती शिंदेंकडे शिवसेनेची मागणी

मंगळवेढा : चाळीस वर्षांपासून मराठा समाज आरक्षणासाठी (Maratha Community Reservation) शासनाकडे मागणी करत आहे. मात्र, याची कोणीही दखल घेत नाही. आरक्षणासाठी जरांगे उपोषणाला बसले असून त्यांची प्रकृती खराब होत चालली आहे. त्यामुळं त्यांच्या आंदोलनाला पाठिबा देऊन मराठा आरक्षणाचा आवाज दिल्ली दरबारी पोहचवण्याचे कामे करावे, अशी मागणी मंगळवेढा शिवसेना शहरप्रमुख दत्तात्रय भोसले यांनी खासदार प्रणिती शिंदेंना (Praniti Shinde) पत्राद्वारे केलीये.

या पत्रात त्यांनी म्हटलंय की, नुकत्याच पार पडलेल्या लोकसभा निवडणुकीत महाराष्ट्रात महाविकास आघाडीला अभूतपूर्व यश मिळाले. यामध्ये उद्धव बाळासाहेब ठाकरे यांच्या शिवसेनेचे मोलाचे सहकार्य आहे. सध्या महाराष्ट्रात मराठा समाजाच्या आरक्षण व सगेसोयरे कायद्याच्या अंमलबजावणीसाठी संघर्ष योद्धे मनोज जरांगे पाटील हे अंतरवाली सराटी या ठिकाणी गेल्या चार दिवसांपासून आमरण उपोषण करीत आहेत.

स्थानिक आ. समाधान आवताडे हे भारतीय जनता पक्षाचे लोकप्रतिनिधी असल्याने अद्याप त्यांनी आरक्षणाबाबत भूमिका घेतली नाही, मात्र नवनिर्वाचित खासदार म्हणून आपण तात्काळ पाठिंबा देवून व सरकारवर दबाव आणणे आवश्यक आहे. लोकसभेसाठी महाविकास आघाडीच्या उमेदवार प्रणिती शिंदे यांच्या पाठीमागे मराठा समाजाने मोठी ताकद उभी केल्याने विजयी झाल्या.

सध्या आरक्षणासंबंधी सुरू असलेल्या उपोषणस्थळी राज्यस्तरीय नेते भेटी देऊन पाठिंबा व्यक्त करत आहेत, अशात प्रणिती शिंदे यांनी अंतरवाली सराटी या ठिकाणी जाऊन मनोज जरांगे पाटील यांच्या उपोषणाला पाठिंबा देऊन लोकसभेच्या पावसाळी अधिवेशनामध्ये मराठा आरक्षणाबाबत सकारात्मक भूमिका मांडली पाहिजे, असे मत निवेदनात शहराध्यक्ष भोसले यांनी व्यक्त केले.