होलार समाजाच्या कार्यकर्त्यांनी अडवला मुख्यमंत्र्यांचा ताफा; प्रबोधनकार ठाकरे चौकात उडाला एकच गोंधळ, काय आहे कारण?

पंढरपूर : आषाढी एकादशीच्या (Ashadhi Ekadashi) शासकीय महापूजेसाठी मुख्यमंत्री एकनाथ शिंदे हे मंगळवारी (ता. १६) रात्री पंढरपुरात आल्यानंतर होलार समाजाच्या (Holar Community) कार्यकर्त्यांनी मुख्यमंत्र्यांचा ताफा अडवून घोषणाबाजी केली. यावेळी पोलिसांची एकच धांदल उडाली.

मुख्यमंत्र्यांचा ताफा अडवल्यामुळे प्रबोधनकार ठाकरे चौकात एकच गोंधळ उडाला. होलार समाजासाठी अभ्यास आयोगाची स्थापना करावी, स्वतंत्र आर्थिक महामंडळ स्थापन करावे यासह इतर प्रमुख मागण्यांसाठी होलार समाजाने आंदोलन पुकारले होते.

मुख्यमंत्र्यांनी आषाढी एकादशीच्या महापूजेसाठी येताना होलार समाजाच्या मागण्या मान्य करूनच पंढरपूरला यावे, असा इशारा होलार समाजाने दिला होता. त्यानंतर आज होलार समाजाच्या कार्यकर्त्यांनी मुख्यमंत्री एकनाथ शिंदे यांचा ताफा अडवून घोषणाबाजी केली. यावेळी मुख्यमंत्री शिंदे यांनी आंदोलकांना शांत राहण्याचे आवाहन करत सर्व मागण्या मान्य केल्या जातील, असे आश्वासन दिले. त्यानंतर मुख्यमंत्र्यांचा ताफा पुढील कार्यक्रमासाठी रवाना झाला.