'ओ शेठ... तुम्ही एवढ्यातूनही जाताय थेट !'

सांगोला (सोलापूर) : दुपारची वेळ... सांगोला (Sangola) तालुक्‍यातील कोरोनाच्या (Covid-19) वाढत्या रुग्णसंख्येमुळे सध्या लॉकडाउन (Lockdown) सुरू करण्यात आला आहे. कामाशिवाय बाहेर फिरणाऱ्यांवर सांगोला पोलिसांची (Sangola Police) करडी नजर होती. पोलिस कारवाई (Police Action) करत असले तरीही अनेक जण रस्त्यावरून फिरताना दिसत होते. एक मोटारसायकलस्वार डबल सीट पोलिसांच्या समोरच मास्क (Mask) न लावता (त्यातील एकाने) बंदी असतानाही तसाच चाललेला दिसला. त्या वेळी पोलिसांनी लगेचच त्याला थांबण्याचा इशारा केला व तो जवळ येताच म्हणाले, "ओ शेठ... तुम्ही एवढ्यातूनही जाताय थेट!'. त्याच वेळी पोलिसांपासून थोडं दूर असलेला पाठीमागे बसलेला लगेच म्हणतो, "आमचा नादच असतो थेट!' यांच्या बोलण्यातून पोलिसांच्या कारवाईपेक्षा "ओ शेठ' या गाण्याचाच प्रभाव दिसून आला.

सांगोला तालुक्‍यातील कोरोनाच्या वाढत्या रुग्णसंख्येमुळे सध्या लॉकडाउन सुरू करण्यात आला आहे. तालुक्‍यात 10 हजार 491 कोरोना रुग्ण बरे झाले असून एक हजार 17 रुग्णांवर सध्या उपचार सुरू आहेत. तर आतापर्यंत शासकीय आकडेवारीनुसार 144 रुग्णांचा मृत्यू झाला आहे. जिल्ह्यातील पाच तालुक्‍यांमध्ये वाढत्या रुग्णसंख्येमध्ये सांगोल्याचा समाविष्ट असल्याने येथे निर्बंध घालण्यात आले आहेत. निर्बंध असले तरी अनेकजण रस्त्यावरून अजूनही मोकाटपणे फिरताना दिसत आहेत. प्रशासनातील महसूल, पोलिस व नगर विकास विभागातील अधिकारी व कर्मचाऱ्यांनी एकत्रित येत मोकाट फिरणाऱ्यांविरोधात तसेच नियम न पाळणाऱ्या व्यावसायिकांच्या विरोधात कारवाईचा बडगा उगारला आहे. प्रशासनाद्वारे कारवाई होत असली तरी अनेक जण या कारवाईला जुमानत नाहीत. पोलिसांसमोरच नियम मोडून जाताना दिसतात.

"ओ शेठ'चा बोलण्यातूनही प्रभाव

"ओ शेठ, तुम्ही नादच केलाय थेट,

ओ शेठ, तुम्ही माणूस हाय लई ग्रेट!'

सध्या हे गाणे प्रसिद्धीच्या शिखरावर असून अनेकांच्या ओठांवर गुणगुणताना दिसते. याची प्रचिती कारवाई करतानाही पोलिसांकडून किंवा पाठीमागे बसलेल्या त्या व्यक्तीच्या बोलण्यातून दिसून आले. गाण्याच्या आधार घेत पोलिस सांगत होते की, "ओ शेठ तुम्ही एवढ्यातूनही जाताय थेट!' परंतु पाठीमागे बसलेला परंतु मास्क लावलेला त्यांच्या बोलण्याच्या आधारावरच "ओ शेठ, आमचा नादच असतो थेट' असे सहज बोलून गेला. विनाकारण, विनामास्क फिरणाऱ्यांविरोधात कारवाई करणाऱ्या पोलिसांपेक्षा अन्‌ कारवाई झालेल्या व्यक्तींवरील कारवाईपेक्षा गाण्यातून झालेल्या संवादामुळे लोकांचा टाईमपास मात्र नक्की झाला.