अंकुश शिंदे यांची मुंबईला बदली! दत्तात्रय कराळे नवे पोलिस आयुक्त

सोलापूर : शहराच्या पोलिस आयुक्तपदी (Police Commissioner) दत्तात्रय कराळे (Dattatraya Karale) यांची पदोन्नतीवर बदली झाली आहे. ते सध्या ठाणे शहराच्या पूर्व विभागाचे अप्पर पोलिस आयुक्त (Upper Commissioner of Police) म्हणून कार्यरत होते. दत्तात्रय कराळे मूळचे सोलापूरजवळील देगाव येथील आहेत. दरम्यान, आयुक्त अंकुश शिंदे (Police Commissioner Ankush Shinde) यांची मुंबई येथे विशेष पोलिस महानिरीक्षक (Special Inspector General of Police) (सेवा व सुधार) म्हणून पदोन्नतीवर बदली झाली आहे.

महाराष्ट्र शासनाच्या गृह विभागाने सोमवारी वर्ग एकच्या पोलिस अधिकाऱ्यांच्या पदोन्नतीवर बदल्या केल्या आहेत. त्यानुसार सोलापूरचे पोलिस आयुक्त अंकुश शिंदे यांची बदली झाली आहे. अंकुश शिंदे यांच्या दोन वर्षांच्या कारकिर्दीत त्यांनी सोलापूर शहरातील नगरसेवकांसह अनेकांवर कारवाई करीत गुन्हेगारीवर अंकुश ठेवण्याचा प्रयत्न केला. नगरसेवक सुनील कामाठी यांच्यावरील कारवाईही त्यांच्या कारकिर्दीतील सर्वात मोठी कारवाई ठरली आहे. त्यांच्या कारकिर्दीत आरोपींना स्थानबद्ध व तडीपार करण्याची कारवाईही मोठ्या प्रमाणात झाली होती.

दरम्यान, अंकुश शिंदे यांच्या बदलीने रिक्त झालेल्या पदावर दत्तात्रय कराळे यांची नियुक्ती करण्यात आली आहे. अप्पर पोलिस आयुक्त म्हणून ठाणे शहरामध्ये कराळे यांनी धडाकेबाज कारवाई केली आहे. त्यांना पदोन्नतीने स्वत:च्या जिल्ह्यात सेवा करण्याची संधी मिळाली आहे. कराळे यांच्यासमोर स्वत:च्या शहरातील गुन्हेगारीवर नियंत्रण ठेवून राज्यात शहराचा नावलौकिक करण्याची मोठी जबाबदारी असणार आहे.