नवविवाहितेने राहत्या घरात साडीच्या साह्याने संपवले जीवन; नवऱ्याने पत्नीला हाक मारली, पण..

मोहोळ : एका नवविवाहितेने राहत्या घराच्या पत्र्याच्या पाईपला साडीच्या साह्याने गळफास घेतल्याची घटना सावळेश्वर (ता. मोहोळ) येथे आज दुपारी एक वाजण्याच्या सुमारास घडली. संध्या महेश उराडे (वय 20) रा. सावळेश्वर असे गळफास घेतलेल्या नवविवाहितेचे नाव आहे. मात्र, आत्महत्येचे कारण समजू शकले नाही.

पोलिसांकडून मिळालेल्या माहितीनुसार, मृत संध्या हिचा विवाह (Marriage) वर्षभरापूर्वी सावळेश्वर येथील महेश उराडे यांच्या बरोबर झाला होता. महेश हा बांधकाम मजूर म्हणून काम करतो. मंगळवारी महेश व पत्नी संध्या हे घराच्या वरच्या मजल्यावर गप्पा मारत बसले होते. दुपारी साडेबारा वाजता महेशने संध्या हिला जेवायला बोलाविले. मात्र, तिने मी नंतर जेवायला येते असे सांगितले.

त्यावेळी महेश हा घराच्या खालच्या खोलीत आला व जेवण करून पुन्हा पत्नीकडे गेला. त्यावेळी पत्नीने घराला आतून कडी लावली होती. तिला हाका मारल्या, परंतु आतून काहीच प्रतिसाद आला नाही. ही हकीकत महेशने वडिलांना सांगितली. वडिलांनीही येऊन हाका मारल्या, परंतु त्यांनाही प्रतिसाद मिळाला नाही.

त्यामुळे वडिलांनी दरवाजाला जोराचा धक्का दिला, त्यावेळी दरवाजा कडी कोंड्यातून निसटून उघडला गेला. दोघांनी आत जाऊन पाहिले असता, सध्या हिने साडीच्या साह्याने घराच्या लोखंडी पाईपला गळफास घेतल्याचे दिसले. या घटनेबाबत महेश कालिदास उराडे याने मोहोळ पोलिसात (Mohol Police) खबर दिली असून, अधिक तपास पोलीस उपनिरीक्षक अंजना फाळके करीत आहेत.