सोलापूर : खाद्यतेलाच्या दरवाढीचा भडका सुरू

सोलापूर: खाद्यतेलाचे भाव मागील आठवडाभरात २५ ते ३० रुपये प्रतिकिलो दराने वाढले असून, त्यासोबत मिठाईचा बाजारदेखील भडकला आहे. हॉटेलिंग व्यवसायातदेखील आता खाद्यपदार्थांचे भाव आणखी वाढण्याची शक्यता आहे.

खाद्यतेलाचे अर्थकारण हे अयातीवर सर्वस्वी अवलंबून आहे. पाम तेल हे मलेशियातून आयात होते. पाम तेलाचे भाव हे सर्वात कमी असतात. तसेच पाम तेलाचा वापर कमी किमतीमुळे अधिकाधिक प्रमाणात होतो. मिठायाच्या निर्मितीसाठीदेखील पामतेलाचा वापर अधिक होतो. आता नेमकी पामतेलाची आयात कमी झाली आहे. त्यामुळे सर्वात स्वस्त किमतीच्या तेलाचा पर्याय संपला आहे. त्याचा परिणाम इतर खाद्यतेलाच्या पुरवठ्यावर मागणीचा दबाव वाढवणारा झाला आहे. त्या स्थितीत इतर खाद्यतेलाचे भावदेखील वाढले आहेत.

सूर्यफुलाच्या तेलाची सर्वाधिक आयात युक्रेनमधून होत असते. युक्रेनमध्ये युद्ध सुरू असल्याने तेथून सूर्यफुल तेल मिळण्याचा मार्ग बंद झाला आहेत. तर स्थानिक शेंगा तेल पॅकिंगमध्ये फार मोठ्या प्रमाणात मिळत नाही. सोयाबीनचे बाजारात भाव वाढल्याने तेलाचे भावदेखील वाढले आहेत. एकंदरीत खाद्य तेलाचे भाव महिनाभरातच २० ते २५ रुपये किलोने भडकले आहेत. अजूनही या भावामध्ये वाढ होण्याची शक्यता आहे.

खाद्यतेलाच्या दरवाढीचा फटका मिठाई निर्मितीला बसतो आहे. मिठायांचे भाव पंधरा ते वीस टक्क्यांनी वाढण्याशिवाय पर्याय नाही. खाद्यतेलाचे भाव आटोक्यात आले तरच मिठाईचे दर कमी होऊ शकतात. सध्यातरी भाववाढ अटळ आहे असे म्हणावे लागेल.

- नंदकिशोर तिवाडी, मिठाई व्यापारी, सोलापूर

खाद्यतेलाला महागाईचा तडका

सोयाबीनचे भाव वाढल्याने तेलाचे भाव वाढले

सुर्यफूल तेलाची युक्रेनमधून होणारी आयात युद्धामुळे ठप्प

शेंगा तेलाची मागणी स्थानिक व खुल्या विक्रीवर जोर

पामतेलाची आयात विस्कळीत

या हंगामात कापसाचे भाव वाढल्याने सरकी तेल महागण्याची शक्यता