गणेशोत्सवाच्या पहिल्याच दिवशी गणपती मंदिराची पुरातत्व विभागाकडून तोडफोड

सोलापूर : देशभरात सध्या उत्साहात गणेशोत्सव साजरा होत असताना एकीकडे पुरातत्व विभागाकडून मंदिरातील फरशीची तोडफोड केली जात असल्याचा प्रकार समोर आला आहे. सोलापूर जिल्ह्यातील मंगळवेढा तालुक्यातील माचणूर येथील पुरातन गणेश मंदिरात हा प्रकार घडल्याचं समोर आलं आहे. या तोडफोडीनंतर ग्रामस्थ आणि भाविकांमध्ये संतापाची लाट उसळली आहे.

(Solapur Latest News Updates)

या घटनेनंतर ग्रामस्थांनी पुरातत्व विभागाच्या अधिकाऱ्यांवर गुन्हा दाखल करण्याची मागणी केली आहे. सध्या हे मंदिर पुरातत्व विभागाकडे असून अनेक वेळा तक्रारी करूनही पुरातत्व विभाकाकडून याकडे लक्ष देण्यात येत नसल्याचा आरोप ग्रामस्थांकडून करण्यात येत आहे. तर ऐन गणेशोत्सवात ही कारवाई केल्याची तक्रार ग्रामस्थांकडून करण्यात येत आहे.

ग्रामस्थांनी केलेल्या मंदिरातील फरशी कामावर पुरातत्व विभागाने आक्षेप घेत बुधवारी तोडफोड केली. त्यानंतर ग्रामस्थांनी संतप्त प्रतिक्रिया व्यक्त केल्या आहेत. गणेश चतुर्थीदिवशीच पुरातत्व विभागाने मंदिराच्या कामाची तोडफोड केल्यामुळे आमच्याच नाही तर संपूर्ण महाराष्ट्राच्या भावना दुखावल्या आहेत. त्यामुळे संबंधित अधिकाऱ्यांवर कारवाई करण्याची आम्ही मागणी करत आहोत." अशा प्रतिक्रिया ग्रामस्थांनी व्यक्त केल्या आहेत.