Solapur Water Supply : सोलापूरचा पाणीपुरवठा विस्कळित; लांबोटीजवळ फुटली मुख्य उजनी जलवाहिनी

सोलापूर : सोलापूर- पुणे महामार्गावरील लांबोटी येथे उजनी - सोलापूर मुख्य जलवाहिनीला बुधवारी (ता. २५) दुपारी साडेतीनच्या सुमारास गळती लागली. अचानक लागलेल्या गळतीमुळे परिसरात सर्वत्र पाणीच पाणी झाले. उंचच उंच फवारे उडत होते. मोठ्या प्रमाणात पाणी वाया गेले. दरम्यान महापालिकेच्या आरोग्य अभियंता विभागाने युद्ध पातळीवर गळती दुरुस्ती करण्याच्या कामाला सुरवात केली.

गळतीच्या परिणामातून दोन ते तीन दिवस पाणीपुरवठा विस्कळित होण्याची शक्यता असल्याचे प्रशासनाकडून सांगण्यात आले. पावसाळ्यात सोलापूर जिल्ह्याला म्हणावा तसा पाऊस झाला नाही. एकीकडे उजनी ५८ टक्यांवर आले आहे. दुसरीकडे सोलापूर शहराला पाणीपुरवठा ऐन सणासुदीच्या काळात विस्कळित होत चाललेला आहे.

दरम्यान, बुधवारी दुपारी अचानक लांबोटी पुलाजवळ सोलापूर शहराला पाणीपुरवठा करणारी मुख्य जलवाहिनीला गळती लागली. यामुळे दीडशे ते दोनशे फूट उंच पाण्याचे फवारे उडत होते. येणारे जाणारे नागरिक मोबाईल मध्ये पाणी गळतीचा व्हिडिओ घेत होते.

सोशल मीडियावर व्हिडिओ व्हायरल झाल्यानंतर आणि महापालिकेच्या पाणीपुरवठा विभागास माहिती मिळताच तातडीने पाणीपुरवठा अधिकारी नीलकंठ मठपती व कर्मचारी घटनास्थळी दाखल झाले.

येथे जलवाहिनीला दोन दिवसांपूर्वीच छोटी गळती लागली होती. महापालिकेच्या संबंधित अधिकाऱ्यांना फोनवरून व प्रत्यक्ष भेटूनदेखील याची कल्पना दिली होती. मात्र, महापालिकेच्या अधिकाऱ्यांनी याकडे पूर्णतःदुर्लक्ष केले.

छोट्या गळतीचे बुधवारी सकाळी जलवाहिनी फुटण्यात रूपांतर झाले. बुधवारी सकाळी जलवाहिनी फुटल्याचे महापालिका प्रशासनास सांगितल्यानंतर तत्काळ त्याची दुरुस्ती न करता सायंकाळी साधारणतः ५ वाजण्याच्या सुमारास दुरुस्तीसाठी कर्मचारी आले. दोन दिवस लागलेल्या गळतीकडे महापालिका प्रशासनाने दुर्लक्ष केल्यानेच जलवाहिनी फुटली. जलवाहिनीच्या गळतीमधून २.५ एकर ज्वारीच्या पिकाचे पूर्ण नुकसान झाले. जलवाहिनी फुटण्यातून आमच्या ज्वारी पिकाचे नाहक नुकसान झाले.

- भारत होनमाने, लांबोटी