विद्यार्थ्यांनो अभ्यासाला लागा! ऑक्टोबरअखेरीस विद्यापीठाच्या परीक्षा; अभियांत्रिकीची परीक्षा डिसेंबरमध्ये; सर्व केंद्रांना सीसीटीव्ही कॅमेऱ्यांचे बंधन

सोलापूर : पुण्यश्लोक अहिल्यादेवी होळकर सोलापूर विद्यापीठाच्या शैक्षणिक वर्षाची सुरवात १ जुलैला झाली असून, ९० दिवसानंतर सत्र परीक्षा घेण्याचे ‘यूजीसी’चे आदेश आहेत. त्यानुसार पहिल्या सत्राची परीक्षा ऑक्टोबरअखेरीस सुरू होणार आहेत. दिवाळी सुटीनंतरही परीक्षा सुरूच राहणार असून, अभियांत्रिकीसह अन्य व्यावसायिक अभ्यासक्रमांची परीक्षा डिसेंबरमध्ये होईल.

विद्यापीठाने कोरोना काळात विस्कळित झालेल्या शैक्षणिक वर्षाची व परीक्षांच्या सत्रांची जुळवणी आता पूर्वीप्रमाणे केली आहे. नियोजित वेळेत परीक्षा घेऊन परीक्षांचे निकाल अवघ्या ३० दिवसांत जाहीर करण्याचेही विद्यापीठाचे नियोजन आहे. पुण्यश्लोक अहिल्यादेवी होळकर सोलापूर विद्यापीठाशी जिल्ह्यातील १०८ उच्च महाविद्यालये संलग्नित असून, त्याअंतर्गत अंदाजे ७० हजार विद्यार्थी प्रवेशित आहेत.

दरम्यान, आता प्रत्येक परीक्षा केंद्रांवर सीसीटीव्ही कॅमेरे बंधनकारक करण्यात आले असून, परीक्षा कॉपीमुक्त होण्यासाठी भरारी पथकांचीही नेमणूक केली जाणार आहे. नवीन राष्ट्रीय शैक्षणिक धोरणाची आता अंमलबजावणी झाली आहे. पदवीच्या पहिल्या वर्षाला आणि पदव्युत्तर पदवीच्या अभ्यासक्रमांना ते धोरण लागू झाले आहे. नवीन धोरणानुसार विद्यार्थ्यांना प्रत्यक्ष उद्योगात जाऊन (ॲप्रेंटिस) काम करण्याची संधी मिळणार आहे. दुसरीकडे मुख्यमंत्री युवा कार्य कौशल्य योजनेंतर्गत इयत्ता बारावी ते पदवी-पदव्युत्तर पदवीच्या विद्यार्थ्यांना देखील सहा महिने दरमहा विद्यावेतन देऊन प्रशिक्षणाची संधी आहे.

ऑक्टोबरच्या शेवटच्या आठवड्यापासून परीक्षा

कुलगुरू डॉ. प्रकाश महानवर, प्र कुलगुरू डॉ. लक्ष्मीकांत दामा यांच्या मार्गदर्शनाखाली २०२४-२५ या शैक्षणिक वर्षातील पहिल्या सत्र परीक्षांचे नियोजन सुरू आहे. साधारणत: ऑक्टोबरच्या शेवटच्या आठवड्यापासून परीक्षा सुरू होतील. डिसेंबरअखेरीस सर्व परीक्षांचे निकाल जाहीर होतील, यादृष्टीनेही नियोजन केले जात आहे.

- डॉ. श्रीकांत अंधारे, परीक्षा नियंत्रक, पुण्यश्लोक अहिल्यादेवी होळकर सोलापूर विद्यापीठ

उत्तरपत्रिकांची ऑनलाइन अन्‌ ऑफलाइन तपासणी

परीक्षांचे निकाल वेळेत जाहीर झाल्यास विद्यार्थ्यांना भविष्यातील शिक्षणासाठी अडचणी येत नाहीत. या पार्श्वभूमीवर २० ते ३० दिवसांत निकाल प्रसिद्ध होतील, असे विद्यापीठाने नियोजन केले आहे. त्यासाठी बीए, बी-कॉम, बीएससी अशा पारंपारिक अभ्यासक्रमांच्या उत्तरपत्रिकांची तपासणी ऑफलाइन होणार आहे. तर अभियांत्रिकी, फार्मसीसह अन्य व्यावसायिक अभ्यासक्रमांच्या उत्तरपत्रिकांची तपासणी ऑनस्क्रिन होणार आहे.