सोलापुरात रविवारी सुंद्रीसम्राट संगीत महोत्सव! सोलापूरकरांना शास्त्रीय गायन, संगीत बासरी, कथ्यकची मेजवानी

सोलापूर : सुंद्रीसम्राट कै. सिद्राम जाधव सांस्कृतिक कला मंडळ, दुर्लभ सुंद्री वाद्य कला अकादमी, पंडित चिदानंद जाधव संगीत प्रसारक मंडळ, भारत सरकारचे सांस्कृतिक मंत्रालय राज्य शासनाचा सांस्कृतिक विभागातर्फे रविवारी (ता. २५) सायंकाळी ६ वाजता सोलापुरातील ॲम्फी थिएटरमध्ये सुंद्रीसम्राट संगीत महोत्सव होणार आहे. यावेळी कीर्ती दिल्ली येथील रुपाराणीदास बोराह यांचे कथ्थक नृत्य होणार असल्याची माहिती मंडळाचे सचिव पंडित भीमण्णा जाधव यांनी दिली.

महाराष्ट्राच्या सांस्कृतिक विभागाचे संचालक बिभीषण चवरे, माजी कुलगुरू डॉ. इरेश स्वामी, सिद्धेश्वर देवस्थानचे अध्यक्ष धर्मराज काडादी, जगविख्यात बासरीवादक विवेक सोनार, तबला वादक पंडित कालीनाथ मिश्रा, कथक नृत्यांगना रुपाराणीदास बोराह, शास्त्रीय गायिका प्राजक्ता देशपांडे यांच्या हस्ते महोत्सवाचे उदघाटन होईल. यावेळी सुंद्रीसम्राट महोत्सवाची सुरवात जाधव घराण्याचे पाचव्या पिढीचे बाल कलाकार मास्टर व्यंकटेश जाधव, कलाश्री जाधव, नरेंद्र बजत्री, स्वप्नील शिरशी, नागेश शिरशी, व्यंक्तेश माने यांना तबल्याची साथ संतोष कोथळीकर, चौघडाची साथ राजेंद्रभ हे देणार आहेत.

असा होईल कार्यक्रम...

सोलापूरच्या शास्त्रीय गायिका प्राजक्ता देशपांडे यांच्या गायनाच्या साथीस सोलापू्रचे तबला वादक नितीन दिवाकर व अक्कलकोटाचे ओकार पाठक हे संवादिनीवर साथ देणार आहेत. जगविख्यात बासरीवादक विवेक सोनार यांना तबल्याची साथ पंडित कालिनाथ मिश्रा करतील. सोलापूरचे निवेदक राहुल बिराजदार या महोत्सवाचे सुत्रसंचालन करणार आहेत. हा महोत्सव सर्वांसाठी खुला व मोफत आहे. या महोत्सवाचा लाभ सोलापूर शहर व परिसरातील नागरिकांनी घ्यावा असे आवाहनही सचिव जाधव यांनी केले आहे.