BJP : आपण ज्या रस्त्याने फिरता, त्याची निर्मिती भाजपची

सोलापूर : विरोधकांनी सत्तेवर असताना खुर्च्या उबवण्याचे काम केल्याची टीका करीत लोकसभेचे भाजपचे उमेदवार, आमदार राम सातपुते यांनी गेल्या दहा वर्षांत भाजपने केलेल्या कोट्यवधींच्या कामांची यादीच वाचली. तसेच काँग्रेसच्या उमेदवार, आमदार प्रणिती शिंदे आज ज्या रस्त्याने फिरत आहेत, ते रस्ते भाजपनेच केल्याचा टोला लगावला.

सोलापूर दक्षिण विधानसभा मतदारसंघातील बूथ समित्यांच्या संवाद मेळाव्यात सोमवारी (ता. १) बोलत होते. विकासकामे, नेतृत्वाच्या मुद्यावर कोणत्याही चौकात या, चर्चा करू, मीच काय आमचा बुथप्रमुखही आपल्याला उत्तर देईल, असे आव्हान सातपुते यांनी दिले. आमदार सुभाष देशमुख यांनी मतदारसंघातील दहा गावांना जेवढा निधी दिला तेवढा निधीतरी मध्यमध्ये आणला आहे काय, असा सवालही केला. ४० हजार कोटींचे रस्ते, बाह्यवळण रस्ते, विडी कामगारांसाठी ३० हजार घरे, विद्यापीठाला ६५० कोटी, भूमिगत गटारींसाठी ९५० कोटी, मुद्रा योजनेंतर्गत अडीच लाख लोकांना १७ कोटींचे कर्ज, अडीच लाख कुटुंबांना उज्ज्वला गॅस, ८५० गावांत पाणी या कामांची यादी जाहीर केली.

दहाच काय शेकडो कामे सांगू शकतो. भाजपने शेकडो वर्षांपासून प्रलंबित हिंदूंच्या अस्मितेचा राममंदिराचा प्रश्न सोडवून मंदिर बांधले. ही निवडणूक देशाच्या विकासाची, सुरक्षेची असून सोलापुरात राजकन्येविरोधात एका सामान्य ऊसतोड कामगाराच्या मुलाची लढाई असल्याचे सांगत जुलैमध्ये विमानतळाचे काम संपणार असल्याचे त्यांनी म्हटले. विरोधक सत्तेवर असताना व आम्ही दहा वर्षांत केलेल्या विकासाची तुलना करा, असे आव्हान आमदार सुभाष देशमुख यांनी दिला. तसेच विरोधक विकासाचे मुद्दे संपले की संविधान संपवणार असल्याचे रडगाणे गातात, भाजपला मुस्लिमविरोधी ठरवितात, असे सांगत दहा वर्षांत संविधान का संपले नाही, असा सवाल केला. मतदारसंघात एमआयडीसी उभारणारच याची ग्वाही देत रस्ते, पर्यटन विकासासाठी केलेल्या कामांची माहिती दिली. दरम्यान, सातपुते यांनी बूथ वॉरिअर्सशी संवाद साधत मतदारसंघातील प्रश्नांविषयी चर्चा केली.