Mohol News : इलेक्ट्रिक शॉक लागून एका शेतकऱ्याचा मृत्यू; मोहोळ तालुक्यातील घटना

मोहोळ : बोअरची मोटार चालू करण्यासाठी गेलेल्या एका 32 वर्षीय शेतकऱ्याचा इलेक्ट्रिक शॉक लागून मृत्यू झाल्याची घटना राम हिंगणी ता मोहोळ येथे ता 2 ऑक्टोबर रोजी सकाळी 11 वाजता घडली. राजवर्धन नारायण पाटील रा राम हिंगणी असे मृत शेतकऱ्याचे नाव आहे.

मोहोळ पोलिसां कडून मिळालेल्या माहिती नुसार, बुधवार ता 2 ऑक्टोबर रोजी राजवर्धन पाटील हे रामहिंगणी येथील शेतात राहतात. राजवर्धन हे मका व ज्वारीच्या पिकाला पाणी देण्यासाठी म्हणून बोअरची मोटर चालू करण्यासाठी गेले असता त्यांना पेटीचा इलेक्ट्रिक शॉक लागला व ते जागीच कोसळले. ही घटना राजवर्धन यांचे भाऊ हर्षवर्धन यांना त्यांच्या भाऊजई ने पळत येऊन सांगितली.

त्यावेळी हर्षवर्धन यांनी त्या ठिकाणी जाऊन पाहणी केली असता भाऊ राजवर्धन हा पेटी जवळ पडलेल्या अवस्थेत दिसून आला. तातडीने त्याला रुग्णवाहिकेत उपचारासाठी मोहोळ येथील एका खाजगी रुग्णालयात दाखल केले असता डॉक्टरांनी तपासून मृत घोषित केले. त्यानंतर ग्रामीण रुग्णालयात आणले असता तेथील डॉक्टरांनीही तपासून मृत घोषित केले. या घटनेची खबर हर्षवर्धन नारायण पाटील वय 36 रा राम हिंगणी यांनी मोहोळ पोलिसात दिली असून तपास मोहोळ पोलीस करीत आहेत.