वेळापूर (सोलापूर) : वेळापूर (ता. माळशिरस) येथील महावितरण उपविभागामध्ये शेती पंपाची 9 कोटी 50 लाख रुपये तर घरगुती 2 कोटी रुपयांची अशी सुमारे 11 कोटी 50 लाख रुपयांची विक्रमी वीजबिले वसूल झाल्याची माहिती उपकार्यकारी अभियंता भाऊसाहेब मोटे यांनी दिली.
वेळापूर उपविभागातील 44 गावांतून शेती पंपाची वीजबिले वसुली करण्यासाठी वीज पुरवठा खंडित केला होता. वीज पुरवठा खंडित झाल्यानंतर संघर्षाचे वातावरण निर्माण झाले होते. वेळापूर परिसरातील विविध राजकीय व सामाजिक संघटना, शेतकरी संघटनांच्या समन्वयाने महावितरणचे सर्व कर्मचारी या सर्वांनी एकत्र येऊन बैठक घेऊन चर्चेतून तोडगा काढला. यामुळे कुठलाही संघर्ष, वाद, अनुचित घटना न घडता महावितरणचे वीजबिल वसुलीचे चांगले काम वेळापूर उपविभागात झाले. याचे श्रेय उपकार्यकारी अभियंता भाऊसाहेब मोटे यांनी विविध राजकीय, सामाजिक व शेतकरी संघटना, शेतकरी वर्ग व महावितरणच्या कर्मचाऱ्यांना दिले.
माळशिरस तालुक्यातील एकूण चार विभागांत वेळापूर महावितरण वसुलीमध्ये अव्वल स्थानी आहे. विक्रमी प्रतिसाद मिळाल्याबद्दल महावितरणच्या वतीने भाजपचे तालुका उपाध्यक्ष अमरसिंह माने - देशमुख, माजी जिल्हा परिषद सदस्य सतीश माने - देशमुख, ओंकार देशमुख, स्वाभिमानी शेतकरी संघटनेचे माढा लोकसभा अध्यक्ष कमलाकर माने - देशमुख यांच्यासह आदींचा सत्कार करण्यात आला.
शेती पंपासाठी सलग आठ तास पुरेशा दाबाने वीज पुरवण्यासाठी आवश्यक तेथे दुरुस्तीसह येत्या काळात तांदूळवाडी येथे वीज वितरण उपकेंद्र कार्यान्वित होत आहे. शेतकऱ्यांचे महावितरणला यापुढेही असेच सहकार्य मिळावे.
- भाऊसाहेब मोटे,
उपकार्यकारी अभियंता, वेळापूर
संपादन : श्रीनिवास दुध्याल
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.