Loksabha Election : भाजप निंबाळकरांचं तिकीट कापणार? मोहिते-पाटलांच्या 'या' घोषणेमुळं राजकीय चर्चांना उधाण

अकलूज : भाजपचे संघटन सरचिटणीस धैर्यशील मोहिते-पाटील (Dhairyasheel Mohite-Patil) यांनी माढा मतदारसंघातून लोकसभेची निवडणूक लढविण्याची घोषणा मंगळवार दिवाळी पाडव्याच्या मुहूर्तावर केली. मोहिते-पाटील यांच्या निवडणूक लढविण्याचे घोषणेमुळे मतदारसंघातील राजकीय चर्चांना वेग आला आहे.

भाजपचे विद्यमान खासदार रणजितसिंह नाईक निंबाळकर (Ranjitsingh Naik Nimbalkar) हे देखील येथून निवडणूक लढण्यावर ठाम आहेत. त्यामुळे भाजप माढा मतदारसंघातील उमेदवारीबाबत सुवर्णमध्य कसा काढणार याकडे सोलापूर आणि सातारा जिल्ह्यांचे लक्ष लागले आहे.

गेल्या अनेक दिवसापासून मोहिते-पाटील यांच्या समर्थकांनी सोशल मीडियावर ’आमचे ठरलंय... खासदारच’ अशा स्वरूपाच्या पोस्ट करत धैर्यशील मोहिते-पाटील यांनी लोकसभेची निवडणूक लढवावी याबाबत आग्रह धरला होता. मात्र दिवाळीचा मुहूर्त साधत धैर्यशील मोहिते पाटील यांनी प्रथमच आपण इच्छुक असल्याचे जाहीर केले. माढा मतदारसंघाची उमेदवारी हा आपला हक्कच असून पक्षाकडे मागणी करणार असल्याचे त्यांनी यावेळी स्पष्ट केले.

लोकसभा मतदारसंघाच्या फेररचनेनंतर माढा मतदारसंघाची निर्मिती झाली. २००९ ची निवडणूक ज्येष्ठनेते शरद पवार यांनी लढविली आणि निवडून येत केंद्रात कृषिमंत्री झाले. त्यानंतरच्या २०१४ च्या लोकसभा निवडणुकीत मोदी (भाजप) लाट असतानाही विजयसिंह मोहिते पाटील यांनी निवडणूक लढवत विजय मिळवला होता. २०१९ च्या निवडणुकीपूर्वी मोहिते-पाटील यांनी भाजपमध्ये प्रवेश केला.

भाजपकडून फलटणचे  रणजितसिंह नाईक-निंबाळकर  यांना माढ्यातून उमेदवारी देण्यात आली. निंबाळकर यांच्या विरोधात राष्ट्रवादी काँग्रेसकडून संजय शिंदे यांनी निवडणूक लढवली होती. या निवडणुकीत रणजितसिंह निंबाळकर यांना निवडून आणण्यात मोहिते-पाटील यांचा सिंहाचा वाटा होता. माळशिरस तालुक्यातून सव्वालाखाचे मताधिक्य देत त्यांना निवडून आणले होते.

विद्यमान खासदार रणजितसिंह नाईक निंबाळकर यांनी लोकसभेसाठी भाजपने आपल्याला तयारी करायला सांगितले आहे, असे सांगत त्यादृष्टीने तयारी सुरू केली आहे. नाईक निंबाळकर हे माढ्यातून लढण्याबाबत ठाम आहेत तर धैर्यशील मोहिते पाटील यांनीही इच्छुक असल्याचे जाहीर केले. त्यामुळे भाजप माढ्याचा सुवर्णमध्य कसा काढणार याकडे सोलापूर आणि सातारा जिल्ह्यांचे लक्ष लागले आहे.