Sangli Police : ड्यूटीवरून घरी परतल्यानंतर सांगलीतील पोलिसाची गळफास घेऊन आत्महत्या; काय आहे कारण?

सांगली : शहर पोलिस ठाण्यातील (Sangli Police Station) पोलिस अंमलदार वसीम मुसा अत्तार (वय ४२, रा. मुजावर प्लॉट, बसस्थानक परिसर, सांगली) यांनी राहत्या घरी गळफास घेऊन आत्महत्या केली. काल (सोमवार) सकाळी हा घटना उघडकीस आली. याबाबत शहर पोलिस ठाण्यात नोंद झाली आहे.

दरम्यान, आत्महत्येचे कारण अद्याप अस्पष्ट आहे. पोलिसांनी दिलेली माहिती अशी, की वसीम अत्तार (Wasim Attar) हे चार महिन्यांपूर्वी शहर पोलिस ठाण्यात बदलीने रुजू झाले होते. यापूर्वी ते महात्मा गांधी पोलिस चौकीत कार्यरत होते. काल ते ड्यूटीवरून घरी परतले होते. त्यानंतर त्यांनी राहत्या घरी गळफास घेऊन आत्महत्या केली.

काल सकाळी ही घटना उघडकीस आली. त्यानंतर तातडीने शहर पोलिस घटनास्थळी दाखल झाले. त्यानंतर शासकीय रुग्णालयात नेण्यात आले. त्यावेळी डॉक्टरांनी मृत घोषित केले. उत्तरीय तपासणीनंतर मृतदेह नातेवाईकांच्या ताब्यात देण्यात आला.

त्यांच्या पश्‍चात पत्नी, तीन मुले असा परिवार आहे. त्यांच्या आत्महत्येचे कारण अद्याप समजू शकले नाही. मात्र तरुण पोलिस अंमलदाराने आत्महत्या केल्याने पोलिस वर्तुळात शोक व्यक्त केला गेला. पोलिस निरीक्षक अभिजित देशमुख यांच्यासह ठाण्यातील कर्मचाऱ्यांनी शोक व्यक्त केला.