सांगलीत स्वाभिमानीचा जिल्हाधिकारी कार्यालयावर अर्धनग्न मोर्चा

सांगली : खासदार संजय पाटील यांनी तासगाव, नागेवाडी कारखान्याच्या थकीत ऊस बिलाच्या मागणीसाठी स्वाभिमानी शेतकरी संघटनेने मंगळवारी (ता. १७) विश्रामबाग येथील क्रांतीसिंह नाना पाटील पुतळ्यापासून मोर्चा काढला. बिले न देणाऱ्या साखर कारखानदारांच्या विरोधात घोषणा देण्यात आल्या. या कारखानदारांचे करायचे काय... खाली मुंडके वर पाय...खासदार संजयकाका हाय...हाय... अशा घोषणा आंदोलक शेतकऱ्यांनी दिल्या.

सांगली येथील विश्रामबाग चौकातील क्रांतीसिंह नाना पाटील पुतळ्यापासून निघालेला मोर्चा जिल्हाधिकारी कार्यालयात पोहोचला. त्याठिकाणी जिल्हाधिकारी कार्यालयाच्या प्रवेशद्वारावर मोर्चा आडवण्यात आला. यावेळी संघटनेचे जिल्हाध्यक्ष महेश खराडे यांनी तासगाव, नागेवाडी कारखान्याची बिले थकल्याने शेतकरी अडचणीत आले आहेत. आम्ही आत्ता अर्धनग्‍न अवस्थेत मोर्चा काढला आहे. यापुढे पूर्णनग्न काढू असा इशारा दिला. स्वाभिमानी शेतकरी संघटनेचे संदीप राजोबा दोघांनी आंदोलनाचे नेतृत्व केले.

तासगाव, नागेवाडी कारखान्याला ऊस गाळप घातलेले सुमारे २०० हून अधिक शेतकरी मोर्चात सहभागी झाले होते. खासदार संजय पाटील ९ ऑगस्टपर्यंत शेतकऱ्याच्या खात्यावर वर्ग करतो असा शब्द दिला होता. या पार्श्‍वभूमिवर तासगावातील ठिय्या आंदोलन थांबविले. पण त्यांनी पुन्हा शेतकऱ्यांना ठेंगा दाखवलाय. त्यांनी शब्द पाळला नाही. १५ ऑगस्टच्या दिवशी मोर्चास परवानगी न दिल्याने मंगळवारी (ता. १७) रोजी मोर्चा काढला. मोर्चास पोलिसांचा मोठा बंदोबस्त तैनात केला होता.