ताकारी ने तारले; विजेने मारले; आळसंद परिसरातील चित्र

आळसंद (जि. सांगली) : आळसंद परिसरात ताकारी योजनेचे पाणी आवर्तन सोडले आहे. पंरतु विजेच्या सतत लंपडावामुळे शेतकरी त्रस्त झाले आहेत. ताकारीच्या पाण्याने तारले तर वीज मारले. अशी विचित्र अवस्था शेतकऱ्यांची झाली आहे. महावितरणच्या वरिष्ठ अधिकाऱ्यांनी सुरळीत वीज पुरवठा करावा, अशी मागणी आहे. 

परिसरातील बलवडी, आळसंद, तांदळगाव, वाझर, कमळापूर गावांना ताकारी योजनेचे पाणी लाभदायी ठरले आहे. ताकारी योजनेचे आवर्तनाचे पाणी येरळा नदीत सोडले आहे. यामुळे बळिराजा स्मृती धरण व वाझरचा कोल्हापूर पद्धतीचा बंधारा पाण्याने तुडुंब भरला आहे. पंरतु वीज पुरवठा सुरळीत नसल्याने उपलब्ध पाण्याकडे शेतकऱ्यांना केवळ पाहत बसवे लागत आहे.

ताकारी व आरफळ योजनेच्या पाण्याच्या भरवश्‍यावर शेतकऱ्यांनी मोठ्या प्रमाणात बागायती केल्या आहेत. ऊस, केळी, भाजीपाला, मका यासह विविध पिके घेतली आहेत. त्यासाठी त्यांनी लाखो रुपये खर्च केले आहेत. विद्युत पंपाची वीज सतत ये-जा करीत असल्याने शेतकरी वैतागून गेले आहेत. वरिष्ठ अधिकाऱ्यांनी लक्ष घालून वीज पुरवठा सुरळीत करावा, अशी मागणी आहे. 

कोरड घशाला पाणी उशाला
वीज सतत ये-जा करीत आहे. वीज सुरळीत करावी. असे महावितरणच्या कर्मचाऱ्यांकडून समाधानकारक उत्तरे दिली जात नाहीत. अशी परिस्थितीत शेतकऱ्यांनी कुणाकडे दाद मागायची, असा प्रश्न शेतकऱ्यांच्या समोर आहे. 
ताकारी योजनेचे पाणी येरळात आले आहे. परंतु वीज पुरवठा खंडित होत असल्याने पिकांना पाणी देता येत नाही. उपलब्ध पाण्याकडे केवळ हाताशपणे पाहत बसावे लागत आहे. एकंदरीत कोरड घशाला पाणी उशाला अशी परिस्थिती निर्माण झाली आहे. 
- संतोष जाधव, शेतकरी बलवडी (भा.) 

लवकरच वीज पुरवठा सुरळीत

उन्हाळ्याचे दिवस असल्याने शेतकरी एकाच वेळी विद्युत पंप सुरू करतात. शिवाय फिडरवर क्षमतेपेक्षा जास्त विद्युत पंप आहेत. त्यामुळे विद्युत दाब वाढल्याने वीज सतत ये- जा करत आहे. लवकरच वीज पुरवठा सुरळीत केली जाईल. 
- अंकुश तारळेकर, शाखा अभियंता महावितरण वीज कार्यालय, आळसंद. 

संपादन : युवराज यादव