माजी आमदाराकडून संचालकाला जीवे मारण्याची धमकी 

सोलापूर : सोलापूर कृषी उत्पन्न बाजार समितीचे कनिष्ठ लिपिक यु.आर. दळवी यांच्याकडे प्रभारी सचिवपद दिल्याच्या कारणावरून बाजार समितीच्या बैठकीत दोन संचालकांमध्ये वादावादी झाली. संचालक तथा माजी आमदार दिलीप माने यांनी संचालक श्रीमंत बंडगर यांना शिवीगाळ करून जिवे मारण्याची धमकी दिली आहे. याप्रकरणी जेलरोड पोलिसात गुन्हा दाखल झाला आहे. 

हेही वाचा : झेडपी अध्यक्षपदामुळे मोहितेंचे समाधान? 

संचालक बंडगर हे सुभाष देशमुख यांचे समर्थक
तज्ञ संचालक श्रीमंत नारायण बंडगर (रा. पाथरी ता. दक्षिण सोलापूर) यांनी फिर्याद दिली आहे. माजी आमदार दिलीप ब्रह्मदेव माने हे माजी सभापती व संचालक आहेत. संचालक बंडगर हे माजी सहकार मंत्री, आमदार सुभाष देशमुख यांचे समर्थक आहेत. सध्या आमदार विजयकुमार देशमुख हे बाजार समितीचे सभापती आहेत. 

हेही वाचा : सोलापूर राष्ट्रवादीत नेते आहेत, नेतृत्व नाही

शिवीगाळ, दमदाटी केल्याचा आरोप 
गुरुवारी सकाळी दहा वाजता कृषी उत्पन्न बाजार समितीच्या संचालकांची बैठक होती. या बैठकीत संचालक श्रीमंत बंडगर यांनी कनिष्ठ लिपिक यु.आर. दळवी यांच्याकडे बाजार समितीचे प्रभारी पद का दिले याची विचारणा केली. या कारणावरून माने आणि बंडगर यांच्या वाद झाला. दळवी यांच्यावर भ्रष्टाचाराचे आरोप आहेत, तरीसुद्धा त्यांच्याकडे पदभार दिला असे संचालक बंडगर यांचे म्हणणे आहे. याबाबत अशी विचारणा केल्यानंतर माने यांनी शिवीगाळ, दमदाटी केल्याचे तसेच पुठ्ठ्याच्या पॅडने मारल्याचे संचालक बंडगर यांनी आपल्या फिर्यादीत म्हटले आहे. पोलिस उपनिरीक्षक देविदास कारंडे तपास करीत आहेत.