बेळगाव जिल्ह्यात तीन दिवस ‘विकेंड’ लॉकडाउन

बेळगाव : कोरोनाच्या पार्श्वभूमीवर बेळगाव जिल्ह्यात पुन्हा एकदा ‘विकेंड’ला तीन दिवस पूर्ण लॉकडाउनची घोषणा जिल्हाधिकारी डॉ. एम. जी. हिरेमठ यांनी मंगळवारी (ता.१) केली आहे. जिल्ह्यात कोरोना रूग्णसंख्या व बळी लक्षात घेऊन शुक्रवारी (ता.४) सकाळी ६ ते सोमवारी (ता.७) सकाळी ६ वाजेपर्यंत लॉकडॉऊनचा कालावधीत जाहीर केला आहे.

यापूर्वी शनिवार, रविवार असे २ दिवस विकेंड लॉकडाऊन असायचे. पण, यावेळी तीन दिवस विकेंड लॉकडाउन घोषित केले आहे. यामुळे शुक्रवार ते रविवार असे तीन दिवस कडकडीत लॉकडाउन असेल. या दरम्यान विनाकारण घराबाहेर पडणे, वाहन चालविणे यांच्यावर कारवाई केली जाईल. शिवाय सकाळी सहा ते दहा यावेळेत देण्यात आलेली शिथिलता रद्द केली जाईल. केवळ अत्यावश्‍क सेवा सुरु राहतील. यात रेशन दुकाने, दूध विक्री आणि मेडिकलसारख्या सेवांचा समावेश आहे. उर्वरित सेवा वगळल्या आहेत.

जिल्ह्यात यापूर्वी दोनवेळा विकेंड लॉकडॉउन जाहीर झाले होते. येत्या शुक्रवारपासून तिसरे विकेंड लॉकडाऊन असेल. पण, या दरम्यान रुग्णालय, अत्यावश्‍यक वस्तूंची खरेदी, दूध पुरवठा किंवा खरेदीला निर्बंध असणार नाही. ऑनलाईन आहार सेवा, सरकारी कर्मचारी सरकारी कार्यालयामध्ये उपस्थित राहणे, रेशन वाहतूक किंवा वितरण करण्यासाठी परवानगी देण्यात आली आहे. पण, ही सेवा सकाळी सहा ते दहा यावेळेतच पुरवली जाईल. रयत संपर्क केंद्रातून कृषी बियाणे, खत वितरणासाठी सकाळी ६ ते दुपारी १२ यावेळेत मुभा असेल. लग्नासाठी परवानगी देण्यात आली आहे. पण, त्यासाठी अगोदर परवानगी घेतलेली असावी. या आदेशाचे उल्लंघन झाल्याचे आढळल्यास दंडसंहिता १८८ अन्वये कारवाई केली जाईल, असे जिल्हाधिकारी हिरेमठ यांनी कळविले आहे.