Sangli Police : शेततळ्यात बुडून सहायक पोलिस उपनिरीक्षकाचा दुर्देवी अंत

मिरज : सोनी (ता. मिरज) येथे सांगली पोलिस दलातील यांत्रिकी विभागात कार्यरत सहायक पोलिस उपनिरीक्षक तिमंथी ऊर्फ बाळ दयानंद आवळे (वय ५६) यांचा शेततळ्यात बुडून मृत्यू झाल्याची घटना घडली.

याबाबत माहिती अशी, की सांगली पोलिस दलाकडील (Sangli Police Force) परिवहन विभागात गृहरक्षक दलातील उमेदवारांची चालक पदाची चाचणी भोसे येथील विश्वेश्वरैय्या महाविद्यालय परिसरात होणार होती. परिवहन विभागाकडील अधिकाऱ्यांसह दहा-पंधरा कर्मचारी गेले होते.

दोनशे उमेदवारांची चाचणी घेण्यात आली. चाचणीनंतर आवळेंसह दहा-बारा सहकारी शेततळ्याशेजारी जेवणास गेले. आवळे व एक सहकारी पोहण्यास गेले. तिमंथी आवळे अचानक पाण्यात बुडाले. सहकाऱ्यांनी शोध घेण्याचा प्रयत्न केला. मात्र ते सापडले नाहीत. रात्री उशिरा त्यांचा मृतदेह सापडला. मिरज ग्रामीण पोलिस ठाण्यात नोंदीचे काम रात्री उशिरापर्यंत सुरू होते.