"खेलो इंडिया'चे नावाखाली "त्यांची' चंगळ

नगर : गुवाहाटी (आसाम) येथील "खेलो इंडिया' या स्पर्धेसाठी राज्य सरकारकडून खेळाडू व प्रशिक्षकांची विमान प्रवासाची सोय केली आहे. हेच शासन शालेय राष्ट्रीय स्पर्धेत खेळाडू व प्रशिक्षकांना दुय्यम वागणूक देते. रेल्वेचे आरक्षण मिळवतानाही त्यांची दमछाक होते. या सापत्नपणाबद्दल क्रीडावर्गात नाराजीचे वातावरण आहे. 

गुवाहाटी (आसाम) येथे 9 ते 21 जानेवारी या कालखंडात "खेलो इंडिया' युवा राष्ट्रीय स्पर्धा होत आहे. 17 व 21 वर्षे वयोगटात 19 क्रीडा प्रकारांत महाराष्ट्रातील संघ "खेलो इंडिया' स्पर्धेत सहभागी झाले आहेत. संघासोबत व्यवस्थापक, मार्गदर्शक व सहमार्गदर्शकांसह खेळाडू गुवाहाटीत दाखल झाले आहेत. काही संघ अजून जाणार आहेत. राज्य सरकारने त्यांच्यासाठी विमानसेवा पुरविली. मात्र, या खेळाडूंच्या नावाखाली इतरांचेच पर्यटन झाले आहे. 

अवश्‍य वाचा - स्वीकृत नगरसेवकाच्या परीक्षेत सारेच नापास 

खेळाडू घडविणारे बाहेरच

खेळाडूंसोबत 101 मार्गदर्शक, व्यवस्थापकांपैकी जवळपास 85 जण क्रीडा खात्यात विविध जिल्ह्यांत कार्यरत आहेत. उर्वरित संघटनेचे प्रशिक्षक, मार्गदर्शक आहेत. यातील अनेकांची निवड ज्या खेळासाठी झाली आहे, त्या खेळाचे त्यांना कितपत ज्ञान आहे, याबद्दल शंका आहे. या स्पर्धेसाठी जे खेळाडू निवडले आहेत, ते विविध जिल्ह्यांतील आहेत. स्वतंत्र निवड चाचणी घेऊन त्यांची निवड केली. मात्र, ज्या शिक्षकांनी अपार कष्ट करून या खेळाडूंना घडविले, त्यांना मात्र डावलले आहे. 

हेही वाचा- बेशिस्त नगरकरांच्या खिशाला कात्री 

शालेय राष्ट्रीय स्पर्धेबाबत दुजाभाव

स्पर्धेस जाण्यासाठी काहींनी तर थेट मंत्रालयातून स्वतःचे नाव टाकण्यासाठी दबाव टाकल्याची चर्चा आहे. एकीकडे शालेय राष्ट्रीय स्पर्धेला जाण्यासाठी रेल्वेचे आरक्षणही बेजबाबदार अधिकाऱ्यांमुळे संघांना मिळत नाही. दुसरीकडे मात्र विमानाने प्रवास, पर्यटन होणार असल्याने क्रीडा विभाग सरसावला आहे. 

सरकारनेच हा भेदाभेद दूर करावा

शालेय राष्ट्रीय स्पर्धांच्या तारखा व ठिकाण महिनाभर आधी निश्‍चित होते. तरीही खेळाडूंच्या प्रवासाचे तिकिटाचे आरक्षण अनेक वेळा होत नाही. "खेलो इंडिया'प्रमाणे शालेय स्पर्धेत खेळाडू व मार्गदर्शकांच्या प्रवासाची व्यवस्था शासनाने विमानाने केल्यास खेळाडूंना न्याय मिळेल. सरकारनेच हा भेदाभेद दूर करावा. 
- राजेंद्र कोतकर, अध्यक्ष, राज्य क्रीडाशिक्षक महासंघ