छेड काढणाऱ्यांना दिली अनोखी शिक्षा

संगमनेर : महिला व युवतींच्या छेडछाडीचे प्रकार थांबविण्यासाठी पोलिस प्रशासन सरसावले असून, शहराच्या मध्यवर्ती ठिकाणी असलेल्या बसस्थानकात विद्यार्थिनींची छेड काढणाऱ्या टारगट मुलाला पोलिस व गृहरक्षक दलाच्या जवानांनी सर्वांसमोर उठाबशा काढायला लावल्या. या प्रकाराची परिसरात जोरदार चर्चा होती. 

हेही वाचा - मौनातूनही होतेय जनजागृती : हजारे 

गेल्या काही दिवसांपासून शहरातील शाळा-महाविद्यालये, तसेच बसस्थानक परिसरात दुपारी व सायंकाळी टारगट मुलांचा उपद्रव वाढल्याच्या तक्रारी येत होत्या. बसस्थानकात चित्रविचित्र केशभूषा, वेशभूषा केलेल्या युवकांचा वावरही वाढला आहे. शहर व बसस्थानक परिसरात युवकांच्या टोळ्या दिवसभर ठिय्या मांडून असतात.

पोलिस व गृहरक्षक दलाचे जवान नेमले

तालुक्‍यातील ग्रामीण भागातून एसटी बसने शहरात शिक्षणासाठी येणाऱ्या युवतींची संख्या मोठी आहे. शाळा-महाविद्यालये सुटल्यानंतर रस्त्यावर, तसेच बसस्थानकात होणाऱ्या गर्दीचा गैरफायदा घेत काही टारगट मुलींची छेड काढत असल्याच्या तक्रारी वाढल्या होत्या. या निर्ढावलेल्या टारगटांचा बंदोबस्त करण्यासाठी पोलिस व गृहरक्षक दलाचे जवान नेमले आहेत. 

अवश्‍य वाचा- तहसीलदारांच्या चारित्र्याची महिलाच करणार चौकशी 

चित्रीकरण "व्हायरल'

बसस्थानकातील उपाहारगृहाजवळ आज दुपारी सव्वादोनच्या सुमारास मुलींना शेरेबाजी करणाऱ्या एका युवकाला पकडून, बंदोबस्तावरील हेडकॉन्स्टेबल राजू डोंगरे, गृहरक्षक दलाच्या जवान अश्विनी वाळे यांनी सर्वांसमोर उठाबशा काढायला लावून माफी मागण्यास भाग पाडले. या प्रकाराचे व्हिडिओ चित्रीकरण करून अनेकांनी ते समाजमाध्यमांवर व्हायरल केल्याने या प्रकरणाची चर्चा शहरात रंगली. 

कठोर कारवाई करणार

बसस्थानक, तसेच महाविद्यालय परिसरात मुलींची छेड काढणारे टारगट, तसेच शहरातील रस्त्यांवरून आरडाओरडा करीत दुचाकीवर चकरा मारणाऱ्यांवर यानंतरच्या काळातही कठोर कारवाई करण्यात येणार आहे. 
- अभय परमार, पोलिस निरीक्षक