Sangli Crime : माझी बायको कोठे गेली ते सांग म्हणत जावयानं सासूवर केला ब्लेडने हल्ला

शिराळा : 'माझी बायको कोठे गेली ते मला सांग,' म्हणत जावयाने येथील सासूवर ब्लेडने वार करून जखमी केल्याची घटना घडली. जया रमेश गायकवाड (वय ४५) असे जखमी महिलेचे नाव आहे.

संशयित जावई प्रवीण महिपती आढाव (अंत्री बुद्रुक, ता. शिराळा) हा हल्ला करून पसार झाला. जखमी गायकवाड यांनी शिराळा पोलिस (Shirala Police) ठाण्यात फिर्याद दिली आहे. ही घटना काल सकाळी ११ च्या सुमारास घडली.

शिराळा पोलिसांकडून मिळालेली माहिती अशी, की गायकवाड शिराळा येथे भाड्याच्या घरात नातू विजयसह राहत आहेत. जया यांची मोठी मुलगी स्वप्ना प्रवीण आढाव ही पती व दोन मुलीसह अंत्री बुद्रुक येथे राहत होती. स्वप्ना दोन मुलींना घेऊन घरात कोणास न सांगता निघून गेली आहे.

प्रवीणने सासू जया यांना स्वप्ना मुलीसह घरातून गेल्याची माहिती आठ दिवसांपूर्वी दिली होती. तिघींचा शोध घेतला असता त्या आढळल्या नाहीत. पत्नी गेल्याचा राग मनात धरून जया व तिचा नातू घरात असताना प्रवीणने तेथे येऊन 'माझी बायको कोठे गेली, ते मला सांग' असे म्हणून सासू जयाबरोबर भांडण काढले. शिवीगाळ केली.

'स्वप्नाचा फोन आला किंवा तिची माहिती मिळाली की मी सांगेन,' असे म्हणताच 'तूच माझ्या घराचा नाश केला,' असे म्हणून प्रवीणने खिशातील ब्लेड काढून जयाच्या दोन्ही हातावर व इतर ठिकाणी वार करून जखमी केले.

जयाने आरडाओरडा केला असता शेजारी जमल्याने प्रवीणने पळ काढला. जखमी जयावर शिराळा येथील उपजिल्हा रुग्णालयात उपचार करण्यात आले. हवालदार सुनील पेटकर अधिक तपास करत आहेत.