युक्रेन मध्ये अडकलेले पुणे-नगर जिल्ह्यातील 12 विद्यार्थी आज सुखरुप पुण्यात दाखल

मोशी - उच्च शिक्षणासाठी (High Education) युक्रेन (Ukraine) मध्ये गेलेले परंतु युक्रेन-रशिया युध्दामुळे (War) अडकलेल्या अनेक विद्यार्थ्यांना (Students) झाप्रोझिया युनिवर्सिटीने पुणे व अहमदनगर जिल्ह्यातील 12 विद्यार्थ्यांना हंगेरी सीमेपर्यंत स्वखर्चाने रेल्वे द्वारे त्यांची सुरक्षित (Secure) पोहचविण्याची जबाबदारी पार पाडली.

हंगेरी ते दिल्ली पर्यंतचा प्रवास विमानाने करत सोमवारी (ता. 7) सकाळी 7 वा. हे सर्वजण दिल्लीत पोहचले. पुणे विमानतळावर पोहोचवण्याची सोय केंद्र सरकारकडून करण्यात आली होती. त्यानंतर या विद्यार्थ्यांना महाराष्ट्र सरकारच्या वतीने दिल्लीतील महाराष्ट्र सदनावर नेण्यात आले. तिथे त्यांच्या अल्पोपाहार व भोजन करून थोडा वेळ आरामाची सोय उपलब्ध करून देण्यात आली होती. रात्री 11 वाजता दिल्लीतील विमानतळावरून त्यांना पुण्याकडे रवाना करण्यात आले. विमान प्रवासाची सोय देखील महाराष्ट्र शासनाकडून करण्यात आली होती. रात्री साधारण 1:20 वाजता हे सर्व विद्यार्थी लोहगाव विमानतळावर पोहचले.

या सर्वांची वाट पहात बसलेले त्यांचे पालक त्यांना पाहताच खूप आनंदी झाले. यात त्या सर्वांचे डोळे भरून आले होते. भारत माता की जय अशा घोषणा देऊन विद्यार्थी विमानतळाबाहेर पडत होते. यात मोशीतील साक्षी सतीश बोराटे ही विद्यार्थ्यीनी देखील होती. तिच्या स्वागतासाठी तिचे वडील सतीश बोराटे, आई सपना बोराटे, भाऊ श्रेयश बोराटे, नगरसेवक व नातेवाईक वसंत बोराटे यांनी पुष्पगुच्छ देऊन साक्षीसह सर्वच विद्यार्थ्यांचे स्वागत केले. यावेळी संतोष बोराटे, सचिन बोराटे, प्रकाश गव्हाणे, किरण उढाणे, गणेश पवार, वासुदेव आल्हाट, अभिषेक बोराटे आदी ग्रामस्थ उपस्थित होते. या विद्यार्थ्याच्या युक्रेन पासून सुरक्षित येण्यासाठी त्यांचे गुरु डॉ. महेंद्र झावरे यांनी अपार कष्ट घेतले. मुलांना सुरक्षित आणल्याबद्दल पालकांनी डॉ. झावरे यांचे आभार मानले.