पे अँड पार्कविरोधात घंटानाद

पिंपरी : पे ॲंड पार्क धोरणाला विरोध, पवना नदीची पूररेषा दर्शविणारे दोन नकाशे तयार करणाऱ्या अधिकाऱ्यांना निलंबित करा, नैसर्गिक नाल्यांचा प्रवाह बदलणाऱ्यांवर कारवाई करा, आदी मागण्यांसाठी एमआयएमने मंगळवारी महापालिकेच्या प्रवेशद्वारासमोर घंटानाद आंदोलन केले. यात महिलांचा सहभाग लक्षणीय होता.

एमआयएमचे प्रदेश महासचिव अकिल मुजावर, शहाराध्यक्ष धम्मराज साळवे, शफिउल्ला काझी, कुतुबुद्दीन होबळे, महिला शहराध्यक्षा रुहिनाज शेख, इरफान नैसर्गी यांच्या नेतृत्वाखाली आंदोलन झाले. मोईन मुलाणी, अकिफ शेख, फरीन शेख, फरिदा शेख, आशा नवतारे, मैमुना शेख, मोहतसेन सिद्दीकी, अब्दुल रौफ कुरेशी आदी उपस्थित होते. त्यांच्या शिष्टमंडळाने अतिरिक्त आयुक्त उल्हास जगताप यांची भेट मागण्यांचे निवेदन दिले. त्यात म्हटले आहे की, कोरोना व लॉकडाउनमुळे नागरिकांची आर्थिक स्थिती अत्यंत बिकट झाली आहे.

इंधनाचे भाव गगनाला भिडले आहेत. त्यामुळे पे अँड पार्क धोरण रद्द करावे. पवना नदीचे दोन भिन्न नकाशे तयार केले आहेत. त्या बनावट नकाशाच्या आधारे स्थानिक जागा मालकांनी बिल्डरांना जागा विकल्या. बांधकाम परवानगी घेत टोलेजंग इमारती बांधून नागरिकांना प्लॅट विकून फसवणूक झाली आहे. त्या अधिकाऱ्यांवर निलंबनाची कारवाई करावी. जाधववाडी, चिखली परिसरातील नैसर्गिक ओढ्यानाल्यांचे अस्तित्व धोक्यात आले आहे. जाधववाडी मातोश्री स्वागत कमानीजवळील नाल्याचा प्रवाह बदलला आहे. त्यामुळे पाणी साचून नागरिकांना त्रास होणार आहे. यात दोषी अभियंते व अधिकाऱ्यांची चौकशी करून कारवाई करावी.