राज्यात सध्या मराठा आरक्षणाचा मुद्दा तापला आहे. अशातच काही नेत्यांनी देखील मराठा आरक्षणाला पाठिंबा दिला आहे. आपल्या पदाचा राजीनामा देत नेत्याने पक्षांतर करण्याचा निर्णय घेतला आहे. भाजपचे प्रदेश प्रवक्ते आणि पिंपरी-चिंचवड महापालिकेतील माजी सभागृह नेते एकनाथ पवार यांनी पक्षाच्या प्राथमिक सदस्यत्वाचा राजीनामा दिला आहे. हे सरकार मराठा समाजाला आरक्षण देऊ शकत नाही. वेळकाढूपणा करत असल्याचा आरोपही त्यांनी यावेळी केला आहे. दरम्यान, पवार हे उद्धव ठाकरे यांच्या शिवसेना (ठाकरे गटात) प्रवेश करणार आहेत.
भाजपचे माजी प्रदेश प्रवक्ते एकनाथ दादा पवार शिवसेना ठाकरे गटात प्रवेश करणार आहेत. दोन दिवसांपूर्वी एकनाथ दादा पवार यांनी प्रदेश प्रवक्ते पदाचा राजीनामा दिला आहे. पवार यांनी मराठा आरक्षणाला जाहीर पाठिंबा देत भाजपातून बाहेर पडण्याचा निर्णय घेतला आहे. एकनाथ पवार हे स्वतःच्या वाढदिवसादिवशी शिवबंधन बांधणार आहेत. नांदेड येथून अनेक कार्यकर्ते जमा झाले असून ते मातोश्रीवर पक्ष प्रवेश करणार आहेत.
एकनाथ पवार यांनी भाजप प्रदेशाध्यक्ष चंद्रशेखर बावनकुळे यांना त्यांचा राजीनामा पाठवला आहे. "आज खूप जड अंत:करणाने मी हा निर्णय घेत आहे. गेली ५० वर्षे ज्या पक्षात काम केले, घडलो त्या भारतीय जनता पार्टीच्या प्राथमिक सदस्यत्वाचा तसेच प्रदेश प्रवक्ते पदाचा राजीनामा देत आहे."
"गेली अनेक वर्षे राज्यातील मराठा बांधव आरक्षण मागत असताना त्यांना हे सरकार आरक्षण देऊ शकत नाही. समाज अत्यंत आशेने या सरकारकडे पाहत असताना देखील केवळ वेळकाढूपणा सुरू आहे. त्या सरकारच्या पक्षात शांत बसून राहण्यापेक्षा मी माझ्या भाजपा प्राथमिक सदस्यत्व पदाचा राजीनामा देत असून आजपासून मी पक्षापासून मुक्त होत आहे", असं ते म्हणाले आहेत.
एकनाथ पवार कोण आहेत ?
एकनाथ पवार हे केंद्रीय मंत्री नितीन गडकरी यांचे खंदे समर्थक म्हणून ओळखले जातात. २०१४ मध्ये त्यांनी भोसरी विधानसभा लढवली होती. या निवडणुकीत ५२ हजार मते पडली. त्यानंतर गेल्या वेळी त्यांनी महापालिकेत सभागृह नेते म्हणून काम पाहिले होते.
गेली अनेक वर्षे ते भाजप पक्षासोबत एकनिष्ठ आहेत. एकवेळा स्वीकृत आणि एकदा जनतेतून निवडून येत दोनवेळा ते नगरसेवक राहिले आहेत. भाजपचे शहराध्यक्षपद पद देखील एकनाथ पवार यांनी भूषवले आहे. पवार यांनी भाजपला सोडचिठ्ठी दिल्याने भोसरीमध्ये भाजपला धक्का बसण्याची शक्यता आहे.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.
