पिंपरी चिंचवडकरांनो...'नो-व्हॅक्सीन नो एंट्री'!

पिंपरी : कोविड आणि ओमायक्रॉनचा पिंपरी-चिंचवड शहरात प्रसार होऊ नये यासाठी खबरदारीचा उपाय म्हणून ‘बेक्र द चेन’ अंर्तगत सर्व नागरिकांना लसीकरणाचे दोन डोस झाल्याची खात्री करुनच प्रवेश देण्यात यावा. ‘ नो-मास्क, नो एंट्री, नो-व्हॅक्सीन नो एंट्री’ हे धोरण अवलंबवावे, असे आदेश महापालिका आयुक्त राजेश पाटील यांनी दिले आहेत. तसेच आता लग्न समारंभ, सामाजिक, धार्मिक, सांस्कृतिक व राजकीय कार्यक्रमांसाठी उपस्थित राहणाऱ्यांची मर्यादा ५० केली असून अंतिम संस्कारासाठी केवळ २० लोकांना मुभा देण्यात आली आहे.(No Vaccine No Entry)

सर्व शाळा, महाविद्यालये, दुकाने, खासगी व सरकारी कार्यालये, बँका, औद्योगिक आस्थापना, उपहारगृहे, बार, मॉल, इतर आस्थापनांनी कर्मचाऱ्यांचे लसीचे दोन्ही डोस झाल्याची खातरजमा करावी. लसीकरण प्रमाणपत्रासह माहिती ठेवावी तसेच सर्वसामान्यपणे काही अपवादात्मक परिस्थिती, अति तातडीची बाब वगळता आस्थापना, कार्यालयात येणाऱ्या सर्व नागरिकांनाही लसीकरणाचे दोन्ही डोस झाल्याची खात्री करुनच प्रवेश देण्यात यावा, नो-मास्क, नो एंट्री, नो-व्हॅक्सीन नो एंट्री हे धोरण अवलंबवावे, असे आदेश महापालिका आयुक्त राजेश पाटील यांनी दिले आहेत.

उपस्थितांची मर्यादा १०० वरून ५०

बंदिस्त ठिकाणी किंवा खुल्या दालनात संपन्न होणाऱ्या लग्न समारंभांसाठी उपस्थितांची मर्यादा १०० वरून ५० करण्यात आली आहे. त्याचप्रमाणे दालनात किंवा खुल्या जागेत होणाऱ्या धार्मिक, सांस्कृतिक, सामाजिक किंवा राजकीय कार्यक्रमांसाठी ही मर्यादा ५० करण्यात आली आहे. हे निर्बंध ३१ डिसेंबर२०२१च्या रात्री१२ पासून अंमलात येणार आहेत. अंतिम संस्कारासाठी उपस्थितांची मर्यादा आता अधिकतम २० असणार आहे.