पवनाथडी जत्रेचा रात्रीचा वेळ वाढविण्याची स्टॉल धारकांकडून होतेय मागणी

जुनी सांगवी : महापालिकेच्या वतीने सांगवी येथील पीडब्ल्यूडी मैदानावर आयोजित पवनाथडी जत्रेत नागरिकांनी पहिल्या दिवसांपासूनच मोठी गर्दी केली आहे. विशेषकरून खवैय्यानी अस्सल गावरान, खान्देशी, मांसाहारी, शाकाहारी पदार्थांवर ताव मारला. पिंपरी-चिंचवडसह उपनगर आणि पुण्यातून नागरिक मोठ्या संख्येने पवनाथडीत येत आहेत. शनिवार व रविवार आलेल्या सुट्टीमुळे दिवसभर चटचटत्या उन्हात व रात्री दहापर्यंत नागरिकांची मोठी गर्दी होत आहे.मात्र नियमानुसार रात्री दहा वाजता बत्ती बंद होत असल्याने सहकुटुंब सहपरिवारासह आलेले खव्वये व स्टॉल धारकांचीही तारांबळ उडत आहे.

स्टॉलमधे झालेली गर्दी फेरफटका,वस्तु खरेदी करून नागरिक मग खाद्यपदार्थांचा आस्वाद घेण्यासाठी वळतात.मात्र अर्धे एक जेवण व वेळेचे बंधन यामुळे नागरिक व स्टॉल धारकांचीही परवड होते.हातातील ग्राहकही सोडता येत नाही.यानंतर अंधारातच आवरावर करत स्टॉल धारकांना घर गाठावे लागत असल्याने परवड होत असल्याने एक तास वाढवून मिळावा अशी स्टॉल धारक व नागरिकांमधून मागणी होत आहे.

रात्री दहावाजता लाईट बंद होत असल्याने अनेकदा ग्राहकांना अंधारातच जेवण करावे लागते.त्यानंतर स्टॉल,भांडी आवरा आवर करणे या गोष्टींना वेळ लागतो.किमान दहा नंतर एक तास वाढवून द्यावा.

- स्वाती वाघवळे - स्टॉल धारक

अनेक स्टॉल्स मध्ये अंधुक प्रकाश आहे.पहिल्या दिवसांपासून अशा ट्युबलाईट बदलण्याची आमची मागणी आहे.

- मिनाक्षी शेट्टीवार स्टॉल धारक

महापालिका प्रशासन व पोलिस प्रशासनाने नागरिक व स्टॉल धारकांची अडचण लक्षात घेऊन एक तास वेळ वाढवून द्यावा त्यामुळे नागरिकांचीही तारांबळ होणार नाही.

- प्रशांत शितोळे माजी नगरसेवक जुनी सांगवी.

महापालिकेच्या व्यवस्था विभागाकडून टप्प्यात टप्प्याने लाईट बंद करण्यात येतात.स्टॉल धारक व नागरिकांची अडचण होवू नये यासाठी आम्ही कटिबद्ध आहोत. दहानंतर परिस्थिती अनूरूप खाद्यपदार्थांच्या स्टॉलवर अर्धा तास वाढवून देण्याचा प्रयत्न करण्यात येईल.

- सुहास बहाद्दरपुरे समाज विकास अधिकारी