![तिकोना किल्ल्यावर सुधारणांची कामे सुरू](http://media.assettype.com/esakal%2F2024-06%2F3982e7b6-c268-425a-99d9-8d3422b8befe%2FVDM24B07607_MED_PC_Today.jpeg?w=480&auto=format%2Ccompress&fit=max)
वडगाव मावळ, ता. १ : मावळ तालुक्यातील तिकोना (वितंडगड) किल्ल्यावर पुरातत्त्व विभागाच्या माध्यमातून सुमारे एक कोटी ४७ लाख रुपये खर्चाची सुधारणांची विविध कामे सुरू झाली आहेत. त्यामुळे गडाचे संवर्धन होऊन त्याला गतवैभव प्राप्त होणार आहे.
वडगाव येथील गडभटकंती दुर्ग संवर्धन संस्थेच्या वतीने गेल्या काही वर्षांपासून गड संवर्धनाची छोटी-मोठी कामे सुरू होती व मोठ्या कामांसाठी पुरातत्त्व विभागाकडे पाठपुरावा करण्यात येत होता. तिकोनागड हा राज्याच्या असंरक्षित स्मारकामध्ये येत असल्यामुळे त्याच्या संवर्धनासाठी निधी उपलब्ध होत नव्हता. गडभटकंती दुर्गसंवर्धन संस्थेने तिकोना गडाच्या संवर्धनासाठी मोहीम सुरू केली व सुमारे एक लाख रुपये खर्च करून वास्तुविशारदांकडून गडाचा विकास आराखडा तयार करून घेतला. या आराखड्यावरून गडावर विविध कामे करण्यासाठी पुरातत्त्व विभागाचे उपसंचालक विलास वाहने यांनी दोन कोटी ११ लाख ४९ हजार रुपये निधी मिळण्यासाठीचा प्रस्ताव शासनाकडे पाठवला होता. त्यानुसार शासनाने गडाच्या संवर्धनासाठी हा निधी मंजूर केला.
सध्या किल्ल्यावरील देवडी परिसर व वेताळ दरवाजा परिसरात पायऱ्या, तटबंदी, बुरूज, सुरक्षा रेलिंग आदी कामे केली जात आहेत. मंजूर निधीतून मोठी कामे होणार असून, लहान कामे गडभटकंती दुर्गसंवर्धन संस्थेच्या माध्यमातून केली जाणार असल्याची माहिती संस्थेचे पदाधिकारी गणेश जाधव यांनी दिली.
पर्यटकांना १५ जूनपर्यंत गडावर येण्यास मज्जाव
तिकोना गडावर पुरातत्त्व विभागाच्या वतीने पायरी मार्गाच्या दुरुस्तीचे काम सुरू असल्याने पर्यटकांना येत्या १५ जूनपर्यंत गडावर येण्यास मज्जाव करण्यात आला आहे. गडावर जाण्यासाठी एकच पायरी मार्ग आहे. पर्यटकांच्या येण्या-जाण्याने नव्याने बसविण्यात येत असलेल्या पायऱ्यांचे नुकसान होण्याची शक्यता आहे. तसेच पर्यटकांच्या सुरक्षिततेचाही प्रश्न असल्याने पर्यटकांना गडावर येण्यास प्रतिबंध केला आहे. दुर्गप्रेमी व पर्यटकांनी सहकार्य करण्याचे आवाहन गडभटकंती दुर्गसंवर्धन संस्थेच्या वतीने करण्यात आले आहे.
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.