सत्तर लाख रुपयांचे पॅकेज नाकारून साकारली आयटी कंपनी

पिंपरी - तो आंबेगाव तालुक्यातील चांदवली खुर्द या छोट्याशा खेड्यातला. सॉफ्टवेअर इंजिनिअर (Software Engineer) झाला. स्वित्झलँडमधील कंपनीत नोकरीला (Job) लागला. ७० लाख रुपयांचे वार्षिक पॅकेज मिळाले. पण, त्याला स्वतःच्या जिद्दीवर वेगळं काहीतरी करायचं होतं. आपल्या बुद्धीचा, अनुभवाचा स्वतःसाठी आणि गावातील तरुणांना रोजगार (Employment) उपलब्ध करून देण्यासाठी वापर करायचा, विचार त्याने केला. आणि नोकरी सोडून स्टार्टअप सुरू केले. स्वतःची टेकऑर्बीट सोल्युशन नावाची आयटी कंपनी (IT Company) स्थापन केली. कोरोना काळ असूनही दोन वर्षात कंपनीने १२ कोटींचा टर्नओव्हर पूर्ण केला. धनेश इंदोरे या तरुणाची ही कहाणी, सर्वांसाठी प्रेरणादायी.

धनेशचे दहावीपर्यंतचे शिक्षण गावातच झाले. त्यानंतर गाव सोडून इंजिनिअरींचे शिक्षण पूर्ण केले. परदेशात मोठ्या पगाराची नोकरी मिळाली. ती करतानाच विविध व्यवसाय केले. शेवटी दुबईतील मोठ्या आयटी कंपनीत मोठ्या हुद्द्यावर काम करताना स्वतःची कंपनी सुरू करण्याचा निर्णय घेतला. त्याच वेळी स्वीझरलँडमधील एका कंपनीने ७० लाख रुपये पगाराच्या नोकरीची ऑफर दिली. ती सोडून धनेश मायदेशी परतला.

मार्च २०२० मध्ये भारतासह जगभरात कोरोनाचा कहर सुरू असताना, चार तरुण इंजिनिअर्सना नोकरीवर घेत बाणेर येथे एका छोट्या फ्लॅटमध्ये धनेशने आपली कंपनी सुरू केली. आज १२५ तरुण नोकरीस आहेत. पहिल्याच वर्षांत कंपनीने दोन कोटींचा टर्नओव्हर पूर्ण केला. त्यानंतर परदेशातील कामे मिळाली. मायक्रोसॉफ्ट, डेल, सॅप, गुगल या कंपन्यांनी धनेशच्या कंपनीला पार्टनरशिपही दिली आहे. त्या जोरावरच आज त्याच्या कंपनीचा टर्नओव्हर दोन वर्षांत बारा कोटींवर पोहचला आहे. येत्या वर्षात टर्नओव्हर ४० कोटींवर नेऊन २५० नवीन नोकऱ्या निर्माण करण्याचा त्याचा संकल्प आहे.