लाच स्विकारल्याप्रकरणी दोन लिपिक लाचलुचपत प्रतिबंधक विभागाच्या जाळ्यात

पिंपरी : मिळकतीचे हस्तांतरण व कर पावतीमधील नावाची दुरुस्ती करण्यासाठी लाच (Bribe) घेणारे महापालिकेचे दोन लिपिक लाचलुचपत प्रतिबंधक विभागाच्या जाळ्यात सापडले. ही कारवाई थेरगाव येथील पिंपरी चिंचवड महापालिकेच्या (Pimpri Chinchwad Corporation) ड क्षेत्रीय कार्यालयात शुक्रवारी (ता. १७) सायंकाळी करण्यात आली.

प्रदीप शांताराम कोठावदे (वय 39), हैबती विठ्ठल मोरे (वय 51) अशी कारवाई झालेल्यांची नावे आहे. हे दोघेही महापालिकेच्या थेरगाव येथील क्षेत्रीय कार्यालयातील कर संकलन विभागात लिपिक पदावर कार्यरत आहेत. तर यातील तक्रारदार यांचा रिअल इस्टेटचा व्यवसाय असून ते फ्लॅट, शॉप, ऑफिस भाड्याने देणे तसेच भाडे करारनामा, खरेदी खत मिळकतीचे हस्तांतरण आदी कामे करतात. दरम्यान, तक्रारदार त्यांच्याकडे आलेल्या लोकांच्या मिळकतीचे हस्तांतरण व कर पावतीतील नावाच्या दुरुस्ती करण्यासाठी आरोपींना भेटले असता कोठावदे याने साडेपाच हजार तर मोरे याने तीन हजारांच्या लाचेची मागणी केली .

दरम्यान, याबाबत तक्रार यांनी लाचलुचपत प्रतिबंधक विभागाकडे तक्रार केली. त्यानुसार शुक्रवारी सायंकाळी क्षेत्रीय कार्यालयात सापळा रचण्यात आला व दोघांनाही ताब्यात घेण्यात आले . रात्री उशिरापर्यंत त्यांच्यावर वाकड पोलिस ठाण्यात गुन्हा नोंद करण्याची प्रक्रिया सुरू होती.