पिंपरी चिंचवड: आदिती कटारे हिची भारतीय वायुसेनेत निवड

पिंपरी चिंचवड: भारतीय संरक्षण दलाच्या वायुसेनेने नुकताच निकाल जाहीर केला. त्यामध्ये पिंपरी-चिंचवड शहरातील आदिती कल्याण कटारे हिची निवड झाली आहे. निवड झाल्याबद्दल तिच्यावर अभिनंदनाचा वर्षाव होत आहे.

शाहूनगर येथे आदिती वास्तव्याला आहे. सध्या ती पुण्यात एका खासगी कंपनीत कार्यरत आहे. ऑक्टोबर २०२० रोजी तिने वायुसेना सामाईक परीक्षा चाचणी (एएफसीएटी) दिली होती. त्याचा निकाल बुधवारी जाहीर झाला. या परीक्षेत संपूर्ण देशातून २४० जणांची निवड झाली. त्यात आदितीचा समावेश आहे. तिचे दहावीपर्यंतचे शिक्षण शाहूनगरमधील कमलनयन बजाज शाळेत झाले. पूर्वी शाळेत प्रजासत्ताक किंवा स्‍वातंत्र्यदिनी ध्वजवंदनासाठी निवृत्त कर्नल प्रकाश सुर्वे यायचे. त्यांच्या भाषणाने तिला हा मार्ग सापडला. तेव्हापासून तिने देश सेवेत जायचे स्वप्न पाहिले होते.

बारावीत चांगले गुण घेऊन बीटेक करण्यासाठी व्हीआयटी कॉलेज बिबेवाडीला प्रवेश घेतला. त्यानंतर स्नातक प्रबंधन प्रवेश परीक्षा (ग्रॅज्युएट रिकार्ड एक्झामिनेशन) परीक्षेत चांगले गुण मिळवून अमेरिकेतील चांगल्या विद्यापीठामध्ये प्रवेशदेखील मिळवला; पण तिला देश सेवेतच रस असल्याने ही परीक्षा दिली. नोकरी करतानाच तिने भारतीय सेवेतील प्रवेशाच्या परीक्षेसाठी खडतर परिश्रम घेतले आणि ही परीक्षा उत्तीर्ण होऊन पाच दिवसांचा अवघड सेवा निवड मंडळ (सर्व्हिसेस सिलेक्शन बोर्ड) मुलाखतसुद्धा यशस्वीरीत्या पूर्ण केली. पाच सप्टेंबरपासून ती हैदराबादमधील प्रशिक्षणास सुरुवात करणार आहे. ट्रेनिंग पूर्ण झाल्यावर एरोनॉटिकल इंजिनिअर ही डिग्री मिळवून उड्डाण अधिकारी (फ्लाइंग ऑफिसर) म्हणून इंडियन एअर फोर्समध्ये सहभागी होऊन देश सेवा करेल, असे आदितीने सांगितले. माजी उपमहापौर तुषार हिंगे, नगरसेविका अनुराधा गोरखे, नगरसेवक समीर मासुळकर, विशाल मासुळकर यांनी तिचे अभिनंदन केले.