पिंपरीत दोन कुटुंबात हाणामारी

पिंपरी : पिंपरीतील (pimpri) नेहरूनगर येथे दोन कुटुंबात हाणामारी झाली. याप्रकरणी पिंपरी पोलिस (pimpri police) ठाण्यात परस्पर विरोधी गुन्हा दाखल झाला आहे. नीलेश मोणीयॉडी थेवर (वय ३२, रा. अण्णासाहेब मगर स्टेडियम रोड, नेहरूनगर, पिंपरी) यांनी दिलेल्या फिर्यादीनुसार, निजामुद्दीन जावेद शेख, मयुरूद्दीन शेख, जावेद शेख, शहनाज व निजामुद्दीनची आई (सर्व रा. वाघेरे टॉवरजवळ, नेहरूनगर, पिंपरी) यांच्यावर गुन्हा दाखल झाला आहे.

रविवारी (ता. २९) दुपारी एकच्या सुमारास आरोपी निजामुद्दीन हा फिर्यादी यांच्या घरात चोरी करण्याच्या उद्देशाने घुसला. चोरी न करताच तो पळून गेला. दरम्यान फिर्यादी यांच्या आईने चोरचोर म्हणून आरडाओरडा केला. त्यावेळी आरोपींनी ‘आम्ही तुम्हाला चोर दिसतो का’ असे म्हणत फिर्यादी व त्यांच्या आईला मारहाण करून जिवे मारण्याची धमकी दिली. याप्रकरणी निजामुद्दीन शेख व मयुरूद्दीन शेख या दोघांना पोलिसांनी अटक केली आहे.

तर शहनाज जावेद शेख यांनी दिलेल्या फिर्यादीनुसार नीलेश मोणीयॉडी थेवर (वय ३३), मोणीयॉडी थेवर (वय ५९), मुथ्थुसेल्वी मोणीयॉडी थेवर (वय ५५), वर्षा मोणीयॉडी थेवर (वय २५, सर्व रा. वाघेरे टॉवरजवळ, नेहरूनगर, पिंपरी) यांच्यावर गुन्हा दाखल झाला आहे. फिर्यादीची आई कचरा झटकत असल्याच्या कारणावरून आरोपी नीलेश व मोणीयॉडी यांनी फिर्यादी व त्यांच्या आईला शिवीगाळ करीत हाताने मारहाण केली. त्याबाबत विचारणा करण्यासाठी फिर्यादी आरोपींच्या घरासमोर गेले असता आरोपींनी फिर्यादी व त्यांच्या नातेवाईकांना शिवीगाळ केली. निलेशने विटेच्या तुकड्याने फिर्यादीला मारले. याप्रकरणी नीलेश व मोणीयॉडी या दोघांना पोलिसांनी अटक केली आहे.