टायगर ग्रुपच्या रायगड जिल्हाध्यक्षाला चिंचवडमध्ये अटक

पिंपरी - नवी मुंबईमधील कामोठे पोलिस ठाण्यात दाखल असलेल्या प्राणघातक हल्ल्याच्या (Murderer Attack) गुन्ह्यातील फरारी आरोपीला (Accused) पिंपरी चिंचवड गुन्हे शाखेच्या खंडणी विरोधी पथकाने चिंचवड मध्ये अटक (Arrested) केली. हा आरोपी टायगर ग्रुपचा रायगड जिल्हाध्यक्ष आहे. (Raigad District President of Tiger Group Arrested in Chinchwad)

नीलेश रमेश चव्हाण (वय ३०, रा. साक्षी पार्क -२ मालेवाडी स्टॉप, सुकापुर ता. पनवेल, जि. रायगड) असे आरोपीचे नाव आहे. १५ नोव्हेंबर २०२० ला कामोठे येथील एका हॉटेलमध्ये बिल देण्याच्या कारणावरून फिर्यादी व आरोपी यांच्यात वाद झाला होता. त्यावेळी नीलेश याच्यासह चार ते पाच जणांनी मिळून हॉटेल चालक व वेटर यांना मारहाण केली होती. याप्रकरणी कामोठे पोलिस ठाण्यात प्राणघातक हल्ल्याचा गुन्हा दाखल आहे. यातील मुख्य सूत्रधार असलेला नीलेश हा फरारी होता. दरम्यान, तो सोमवारी (ता. २१) सायंकाळी चिंचवडमधील क्विन्स टाऊन सोसायटीसमोर येणार असल्याची माहिती खंडणी विरोधी पथकाला मिळाली. त्यानुसार पोलिसांनी त्याला सापळा रचून ताब्यात घेतले. चौकशी केली असता त्याने गुन्ह्याची कबुली दिली. आरोपीला कामोठे पोलिसांच्या ताब्यात दिले आहे.