जगद्‌गुरू श्री संत तुकाराम महाराज पालखी सोहळ्याचे २८ जूनला देहूतून पंढरपूरकडे प्रस्थान होणार आहे. यानिमित्त लाखो भाविक देहूत दाखल होत आहेत. या पार्श्वभूमीवर प्रशासन, संस्थान आणि अन्य यंत्रणांच्या तयारीची वृत्तमालिका आजपासून...
देहू - संत तुकाराम महाराज पालखी सोहळ्यानिमित्त देहू नगरपंचायतीकडून जय्यत तयारी चालू असून रस्तेदुरुस्ती, इंद्रायणी नदीसह ठिकठिकाणची स्वच्छता, डास प्रतिबंधात्मक औषधांची फवारणी यांसारखी निरनिराळी कामे वेगात सुरू आहेत. निर्मल वारी साकारण्यासाठी वारकरी आणि भाविकांना तब्बल एक हजार स्वच्छतागृहे उपलब्ध करून दिली जात आहेत.
आषाढी वारीसाठी संत तुकाराम महाराज पालखी सोहळा येत्या २८ जूनला देहूतून पंढरपूरकडे प्रस्थान ठेवणार आहे. या पार्श्वभूमीवर देहू नगरपंचायत प्रशासनाच्यावतीने जय्यत तयारी करण्यात येत आहे. इंद्रायणी नदीत मोठ्या प्रमाणावर असलेली जलपर्णी काढण्यात आलेली आहे. पालखी प्रस्थान सोहळा व्यवस्थित पार पडावा, यासाठी जिल्हा प्रशासनाकडून विविध नगर परिषदांचे दोन अधिकारी आणि नऊ कर्मचारी असे एकूण ११ कर्मचारी आठवडाभर देहू नगरपंचायतकडे वर्ग करण्यात आले आहेत.
याबाबत नगरपंचायतच्या मुख्याधिकारी निवेदिता घार्ग म्हणाल्या, ‘पालखी सोहळ्यानिमित्त येणाऱ्या दिंडीतील वारकरी आणि भाविकांना सोयी-सुविधा देण्यासाठी नगरपंचायतच्या वतीने खास पथके तयार करण्यात आली आहेत. स्वच्छतेसाठी विविध ठिकाणी स्वच्छता कर्मचारी नेमण्यात आले आहेत. देऊळवाडा, इंद्रायणी नदी घाट परिसरात दररोज स्वच्छता करण्यात येत आहे. त्यामध्ये एकूण ५५ कर्मचाऱ्यांचा समावेश आहे. निर्मल वारी होण्यासाठी एक हजार स्वच्छतागृहे विविध ठिकाणी ठेवली जाणार आहेत.’
बाह्यवळण मार्गावरील खड्डे बुजविण्यात आले असून पालखी मार्गाची दुरुस्ती सुरू आहे. वारकरी, भाविकांना पिण्याचे पाणी २४ तास उपलब्ध करून देण्यात येणार आहे. तसेच डासांपासून संरक्षण मिळावे यासाठी गावात औषध फवारणी करण्यात येत आहे. नगरपंचायत कार्यालयात मदत कक्ष सुरू करण्यात येणार आहे.
सर्व कर्मचाऱ्यांच्या सुट्ट्या रद्द...
जगद्‌गुरू संत तुकाराम महाराज पालखी प्रस्थान सोहळ्यानिमित्त रविवार(ता. २३)च्या साप्ताहिक सुट्ट्या रद्द करण्यात आल्या आहेत. सर्व कर्मचाऱ्यांनी कार्यालयीन वेळेत कार्यालयात उपस्थित राहावे, असे आदेश मुख्याधिकाऱ्यांनी दिले आहेत.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.