"पोल्ट्री व्यावसायिकांच्या अडचणी सोडवू"

वडगाव मावळ : ‘‘मावळ तालुक्यातील पोल्ट्री व्यावसायिकांचे प्रश्न व अडचणी सोडविण्यासाठी प्रयत्नशील राहू,’’ असे आश्‍वासन आमदार सुनील शेळके यांनी दिले.

मावळ तालुक्यातील पोल्ट्री व्यावसायिकांच्या अडचणींसंदर्भात आमदार शेळके यांच्या कार्यालयात बैठक घेण्यात आली. मावळ ॲग्रोचे संस्थापक माऊली दाभाडे, पोल्ट्री संघटक सोनबा गोपाळे गुरुजी, एकनाथ गाडे, सचिन आवटे, संभाजी केदारी, उत्तम शिंदे, बाळासाहेब खरमारे, संतोष घारे, महेश काकरे, शिवाजी शिंदे, सुभाष केदारी, महेश कुडले, प्रवीण शिंदे, गजानन खरमारे, विनायक बधाले आदी उपस्थित होते.

तालुक्यात शेतीपूरक पोल्ट्री व्यवसाय गेल्या अनेक वर्षांपासून सुरू आहे. मात्र, येथील काही पोल्ट्री कंपन्या व्यावसायिकांची पिळवणूक करत असल्याचे संघटनेने निदर्शनास आणून दिले. पोल्ट्री व्यावसायिकांना चांगल्या दर्जाची पिल्ले, खाद्य आणि औषधे द्यावीत. पक्षी वेळेत घेऊन जावेत. ग्रोव्हिंग चार्ज वाढवून मिळावा. पंधरा दिवसात शेतकऱ्यांचे पेमेंट कंपन्यांनी करावे आदी मागण्यांबाबत चर्चा झाली. शेतकऱ्यांच्या अडचणी सोडविण्यासाठी व मागण्यांसाठी प्रयत्नशील राहण्याचे आश्‍वासन आमदार शेळके यांनी दिले.