श्री राम मंदिर राष्ट्रार्पणानिमित्त पिंपरी-चिंचवडमध्ये ‘रथयात्रा’

पिंपरी, ता. २० : अयोध्येतील श्रीराम मंदिर राष्ट्रार्पण व मूर्ती प्राणप्रतिष्ठेनिमित्त पिंपरी-चिंचवडमध्ये रविवारी (ता. २१) भव्य ‘रथयात्रा’ आयोजित केली आहे, अशी माहिती भाजपचे आमदार महेश लांडगे यांनी दिली. प्रभू श्रीराम मंदिराचे राष्ट्रार्पण आणि मूर्ती प्राणप्रतिष्ठा सोहळ्यानिमित्त देशभरात उत्साहाचे आणि आनंदाचे वातावरण आहे. शहरातही श्री राम मंदिर आणि श्रींच्या आगमनाचा उत्सव दिमाखदार होणार असून रविवारी (ता.२१) दुपारी ३ वाजता निगडीतील भक्ती-शक्ती चौक येथून ‘रथयात्रा’ काढण्यात येणार आहे. या यात्रेचा समारोप चिखलीतील रामायण मैदान येथे होणार आहे.
या रथयात्रेत हजारो दुचाकी व चारचाकी, चार विजयरथ, राम मंदिर प्रतिकृती, मर्दानी खेळ, डी.जे. ढोल पथक, झांज पथक, श्रीराम जिवंत देखावा, गंगा आरती, सनई चौघडे, महाबली हनुमान, कलश यात्रा, आतषबाजी यासह हिंदू धर्माबाबत जागृती करण्यासाठी विविध देखावे असतील. महिलांची बुलेट फेरी देखील असणार आहे.

हिंदू धर्म संस्कृती आणि अखंड भारताच्या अस्मितेचे प्रतीक प्रभू श्रीराम मंदिरासाठी पाचशे वर्षांपासून भारतीयांना प्रतीक्षा करावी लागली आहे. अनेक दिवस पाहिलेले स्वप्न आता सत्यात उतरत आहे. राम मंदिर राष्ट्रार्पण दिनाच्या पूर्वसंधेला भव्य रथयात्रा होणार असून या सोहळ्यात पिंपरी-चिंचवडकरांनी सहभागी व्हावे.
- महेश लांडगे, आमदार, भोसरी.