Cyber Crime: ‘या’ फाइल, लिंकवर क्लिक करू नका अन्यथा.. पोलिसांकडून आवाहन, युनियन बँकेच्या नावाचा अन् लोगोचा गैरवापर

पिंपरी, ता. १९ : युनियन बँक ऑफ इंडिया या बँकेचा लोगो आणि नावाचा वापर करून वेगवेगळ्या मोबाईल क्रमांकाद्वारे नागरिकांना त्यांचे आधार कार्ड, पॅन कार्ड अपडेट करण्याबाबत मेसेज येत आहेत. त्यामध्ये एक फाइल पाठवली जात असून ती फाइल ओपन करताच त्यांच्या बँक खात्यातील रक्कम काढून घेतली जात आहे. यामधून नागरिकांची मोठ्या प्रमाणात फसवणूक होत आहे. तरी नागरिकांनी अशा प्रकारची लिंक अथवा फाइल ओपन करू नये, असे आवाहन पिंपरी-चिंचवड पोलिसांच्या सायबर सेलने केले आहे.

बँकेच्या नावाचा व लोगोचा वापर करून नागरिकांना मेसेजद्वारे Union Bank Addhar Update61.apk या नावाची एक फाइल पाठवली जात आहे. या फाईलद्वारे नागरिकांच्या मोबाईलमध्ये Torzon Virus पाठवून मोबाईलमधील सर्व वैयक्तिक माहिती घेतली जाते. त्या माहितीचा गैरवापर करून नागरिकांची फसवणूक आणि नुकसान केले जात आहे. त्यामुळे नागरिकांनी अनोळखी मोबाईल क्रमांकाद्वारे आलेल्या मेसेजमधील कोणतीही लिंक, वेबसाइट अथवा फाइलवर क्लिक करू नये, असे आवाहन पोलिसांकडून करण्यात आले आहे.