Maval Vidhansabha: मावळ विधानसभेची जागा काँग्रेसला देण्याची मागणी, ६ जण करणार अर्ज

वडगाव मावळ, ता. १२ ः मावळ तालुका हा काँग्रेसचा पारंपरिक बालेकिल्ला राहिला असल्याने आगामी विधानसभा निवडणुकीत मावळची जागा काँग्रेस पक्षाला मिळावी, यासाठी वरिष्ठ पातळीवर पाठपुरावा करण्याचा निर्णय मावळ तालुका काँग्रेसच्या बैठकीत घेण्यात आला. दरम्यान, पक्षाच्या सहा जणांनी विधानसभा निवडणूक लढविण्याची इच्छा व्यक्त केली आहे.

आगामी विधानसभा निवडणुकीच्या पार्श्वभूमीवर प्रदेश कॉंग्रेस समितीच्यावतीने राज्यातील २८८ जागांवर उमेदवारांची चाचपणी सुरू केली असून, पक्षाच्या इच्छुक उमेदवारांचे अर्ज मागविण्याची प्रक्रिया सुरू केली आहे. त्या अनुषंगाने मावळ तालुका काँग्रेसच्यावतीने गुरुवारी येथे बैठकीचे आयोजन केले होते.

पक्षाचे ज्येष्ठ नेते चंद्रकांत सातकर, तालुकाध्यक्ष यशवंत मोहोळ, संपर्क प्रमुख राजू शिंदे, माजी अध्यक्ष रोहिदास वाळुंज, युवक अध्यक्ष राजेश वाघोले, ॲड. खंडुजी तिकोने, विशाल वाळुंज, एकनाथ येवले, संभाजी राक्षे, सहादू आरडे, गफुर भाई शेख, संभाजी लेंडघर, भरत दळवी, महिला अध्यक्ष पुष्पाताई भोकसे, रूपाली क्षीरसागर, प्रतिभा हिरे, जयश्री मदगे आदी उपस्थित होते.

दरम्यान, यावेळी आगामी निवडणुकीसाठी इच्छुकांची चाचपणी करण्यात आली. यावेळी पक्षाच्या सहा पदाधिकाऱ्यांनी विधानसभा निवडणूक लढविण्याची इच्छा व्यक्त केली. या सर्व इच्छुकांचे अर्ज जिल्हा कॉंग्रेस समितीकडे पाठविण्याचा निर्णय घेण्यात आला. पुढील बैठक २० ते २३ तारखेच्या दरम्यान आयोजित करण्यात येईल, अशी माहिती मावळ तालुका संपर्क प्रमुख राजू शिंदे यांनी दिली.