तरूण-तरूणीचा दुचाकी रस्तादुभाजकाला धडकून मृत्यू

पिंपरी - भरधाव दुचाकी रस्तादुभाजकाला धडकून झालेल्या अपघातात दुचाकीवरील तरूण व तरूणीचा मृत्यू झाला. दुचाकीने दुभाजकाला धडकल्यानंतर पुढे चाललेल्या दुसऱ्या दुचाकीला धडक दिल्याने त्या दुचाकीवरील दोन बहिणी जखमी झाल्या. ही घटना आकुर्डी येथे घडली.

आर्यन नरेंद्र परमार (वय २३, रा. खडकी) व श्वेता अशोक गजभिवे (वय २१, रा. भंडारा) असे मृत्यू झालेल्या तरूण, तरूणीचे नाव आहे. तर दुसऱ्या दुचाकीवरील मृणाल व मधुरा नरहर कुलकर्णी (दोघी रा. काळेवाडी) अशी जखमी झालेल्या बहिणींची नावे आहेत. त्यांच्यावर खासगी रूग्णालयात उपचार सुरू आहेत. आर्यन व श्वेता हे दोघे दुचाकीवरून पुण्याहून निगडीच्या दिशेने जात होते. आकुर्डीतील तुळजाभवानी मंदिराजवळ आर्यनला रस्तादुभाजकाचा अंदाज न आल्याने दुचाकी दुभाजकाला धडकली. त्यानंतर श्वेता पंचवीस ते तीस फूट अंतरावर पडल्याने तिच्या डोक्याला गंभीर दुखापत झाली. तर आर्यनचा जागीच मृत्यू झाला. नंतर दुचाकीने पेट घेतला. निगडी पोलिस अधिक तपास करीत आहेत.